“Zelenskinin ABŞ-a səfəri və Donald Trampla keçirdiyi iki saata yaxın qapalı görüş Rusiya-Ukrayna müharibəsinin gedişində yeni mərhələnin başlanğıcıdır. Trampın sülh təşəbbüslərinə Moskvanın mənfi cavab verməsi Vaşinqtonu Kiyevə hərbi dəstəyi — xüsusən ‘Patriot’ PHO sistemlərinin tədarükünü artırmağa sövq edir. ABŞ artıq Ukrayna ilə birgə Rusiyanın işğalına qarşı daha qətiyyətlə mübarizə aparacaq”.
Avropa.info xəbər verir ki, bunu Sosdem.az-a Zelenski-Tramp görüşünü, NATO-nun Ankara sammitindən sonrakı koordinasiyanı və cəbhədəki son durumu şərh edərkən Milli Cəbhə Partiyasının (MCP) başqan müavini, politoloq Məhəmməd Əsədullazadə deyib.
“Moskvanın Sülhdən İmtinası Vaşinqtonun Dəstəyini Gücləndirdi”
Ekspert ABŞ və Avropa müttəfiqlərinin mövqeyindəki dəyişikliklərə diqqət çəkib:
“NATO-nun Ankara zirvə görüşündən və Vatikandakı təmaslardan sonra Qərb Ukraynaya dəstəkdə daha koordinasiyalı mövqe nümayiş etdirir. Donald Tramp atəşkəs və sülh danışıqlarına cəhd etsə də, Moskva bu təşəbbüsləri geri çevirdi. Nəticədə Ağ Ev Kiyevə siyasi və hərbi dəstəyi genişləndirmək qərarına gəldi. Bu görüş ABŞ-Ukrayna münasibətlərində keyfiyyətcə yeni mərhələdir və Kiyevin döyüş meydanındakı mövqeyini ciddi şəkildə gücləndirəcək”.
“Diplomatiya Dalana Dirənib, Rusiya Raketlərlə Cavab Verəcək”
MCP rəsmisi yaxın perspektivdə münaqişənin siyasi həllinin görünmədiyini vurğulayıb:
“Rusiya hərbi potensialını artırmaq, yeni səfərbərlik dalğası yaratmaq və müharibəni öz şərtləri ilə davam etdirmək niyyətindədir. Bu da diplomatik proses prosesini tamamilə dalana dirəyir. Tərəflər üstünlüyü döyüş meydanında əldə etməyə çalışırlar. Vaşinqtondakı bu görüşdən qəzəblənən Kremlin isə Kiyevə ballistik raket zərbələri ilə cavab verəcəyi gözləniləndir”.
