Paytaxt Bakıda vətəndaşların hər gün üzləşdiyi problemlərdən ən böyüyü yollarda olan tıxaclardır. Bu tıxaclar zaman ötdükcə həm vaxt, həm də ərazi baxımından hər il daha da çətinləşir. Tıxaclar nəticəsində vətəndaşlar işə gecikir, evə tard çatır, şagirdlər və tələbələr dərsə yubanır, avtomobillərin yanacaq sərfiyyatı artdığı üçün sürücülər əlavə maddi xərc çəkirlər.
Avropa.info xəbər verir ki, bunu Sosdem.az-a açıqlamasında Milli Cəbhə Partiyasının (MCP) İdarə Heyətinin üzvü, iqtisadçı Pərviz Şıxalıyev Bakı şəhərindəki nəqliyyat sıxlığı, şəhərsalma problemləri və tıxacların əsas yaranma səbəblərini şərh edərkən bildirib.
Regionlarda iş yerləri açılmalıdır…
MCP rəsmisi tıxacın kökündə duran regional disbalans və təhsil mərkəzləşməsi məsələlərinə diqqət çəkib:
“İllərdir davam edən bu tıxacların birinci səbəbi regionlarda və kəndlərdə iş yerlərinin, kənd təsərrüfatı üçün münbit şəraitin olmamasıdır. Hökumət regionlarda iş yerlərinin açılması üçün iş adamlarına cəlbedici təkliflər verməli, təbii şəraitə uyğun iş yerlərinin yaradılmasına şərait yaratmalıdır. İkinci səbəb isə universitet və kolleclərin 90 faizinin paytaxtda cəmləşməsidir. Regionlarda ali təhsil müəssisələrinin sayı artırılmalı, heç olmasa zonalar üzrə universitetlərin filialları açılmalıdır”.
Sıx tikinti siyasətinə son qoyulmalıdır…
İqtisadçı şəhərsalma infrastrukturundakı nizamsızlıqları və yolların ensizliyini tənqid edib:
“Paytaxtda istismar müddəti başa çatmış 3 ədəd 5 mərtəbəli binanı söküb yerində 4 ədəd 16 mərtəbəli bina tikirlər. Bu da həmin ərazidə əhalinin daha da sıxlaşmasına səbəb olur. Hündürmərtəbəli binaları şəhərdən kənarda inşa edib yeni mikrorayonlar yaratmaq lazımdır. Avtomobillərin sayı dəfələrlə artsa da, küçə və prospektlərin eni 30 il əvvəl necə idisə, indi də elə qalıb”.
İctimai nəqliyyat cəlbedici edilməlidir…
Ekspert ictimai nəqliyyatın inkişafı və beynəlxalq təcrübənin tətbiqi ilə bağlı təkliflərini verərək fikirlərini yekunlaşdırıb:
“İctimai nəqliyyat xidməti vətəndaş sayına görə çox zəifdir, avtobus və metro stansiyalarının sayı azdır. Şəhərin girişlərində böyük dayanacaqlar yaradılmalıdır. İctimai nəqliyyat elə seviyyədə olmalıdır ki, vətəndaş şəxsi avtomobilini həmin dayanacaqda saxlayıb şəhər mərkəzinə avtobus və ya metro ilə rahat gedə bilsin. Əhalisi Bakıdan dəfələrlə çox olan xarici şəhərlərdə mərkəzdə yalnız ictimai nəqliyyatdan istifadə etməklə tıxacın qarşısı uğurla alınır”.
