İyunun 5-də AMEA-nın Elmi Kitabxanasında “Savalan” Tarixi Araşdırmalar İctimai Birliyinin Azərbaycan Respublikası Mədəniyyət Nazirliyinin dəstəyi ilə həyata keçirdiyi “Qərbi Azərbaycanda erməni vəhşiliyi: sənədlərin dili ilə” layihəsi çərçivəsində nəşr olunmuş “Erməni vəhşiliyi: sənədlərin dili ilə” (Qərbi Azərbaycan ərazisində azərbaycanlılara qarşı həyata keçirilmiş soyqırımı arxiv sənədlərində) adlı sənədlər toplusunun təqdimat mərasimi keçirilib.
Tədbiri giriş sözü ilə açan layihə rəhbəri, tarix üzrə fəlsəfə doktoru, dosent Alı Balayev layihənin məqsəd və vəzifələri barədə ətraflı məlumat verib. O, layihənin icrasında iştirak edən tədqiqatçıları və əməkdaşları tədbir iştirakçılarına təqdim edib, görülən işlərin əhəmiyyətindən bəhs edib.
Sənədlər toplusunun tərtibçiləri adından çıxış edən “Savalan” Tarixi Araşdırmalar İctimai Birliyinin sədri, tarix elmləri doktoru Kamran İsmayılov nəşrin elmi və ictimai-siyasi əhəmiyyətini vurğulayıb. O bildirib ki, topluda yer alan arxiv sənədləri Qərbi Azərbaycanda azərbaycanlılara qarşı törədilmiş soyqırımı və deportasiya siyasətinin araşdırılması baxımından mühüm mənbə rolunu oynayacaq. K.İsmayılov qeyd edib ki, nəşrdə toplanmış materiallar gələcəkdə Ermənistan–Azərbaycan münasibətlərinin tarixi aspektlərinin öyrənilməsində tədqiqatçılar üçün dəyərli mənbələrdən biri olacaq.
Kamran İsmayılov rəhbərlik etdiyi ictimai birliyin bu istiqamətdə həyata keçirdiyi və gələcəkdə reallaşdırmağı planlaşdırdığı layihələr barədə də məlumat verib. O, xüsusilə Zəngəzur bölgəsində azərbaycanlılara qarşı törədilmiş soyqırımı və deportasiya hadisələrini əks etdirən arxiv sənədlərinin də nəşrə hazırlandığını diqqətə çatdırıb.
Nəşrin redaktoru və ön sözünün müəllifi, tarix üzrə fəlsəfə doktoru, dosent Mübariz Ağalarlı çıxışında topluda yer alan sənədlərin Cənubi Qafqazda baş verən tarixi-siyasi proseslərin öyrənilməsi baxımından mühüm əhəmiyyət daşıdığını bildirib. O vurğulayıb ki, sənədlər İrəvan bölgəsinin Azərbaycanın qədim tarixi torpaqlarından biri olduğunu təsdiqləyən çoxsaylı faktları özündə əks etdirir.
Tədbirdə çıxış edən AMEA A.A. Bakıxanov adına Tarix və Etnologiya İnstitutunun aparıcı elmi işçiləri, tarix üzrə fəlsəfə doktoru, dosent Rafiq Səfərov və digər iştirakçılar sənədlər toplusunun elmi dəyərindən danışıb, bu istiqamətdə aparılan araşdırmaların davam etdirilməsinin vacibliyini qeyd ediblər.
Tədbirin sonunda layihə rəhbəri Alı Balayev sənədlər toplusunun nəşrinə göstərdiyi dəstəyə görə layihə icraçıları adından Azərbaycan Respublikasının Mədəniyyət Nazirliyinə təşəkkürünü ifadə edib.
