İyunun 14-də Beynəlxalq Qalereyada mərhum rəssam Rəşid Əzimovun əziz xatirəsinə həsr olunmuş “Əbədi İşıq” adlı sərgi-tədbir keçirilib.
Avropa.info xəbər verir ki, tədbirdə rəssamdan yadigar qalan 50-yə yaxın müxtəlif mövzulu əsər tamaşaçılara təqdim olunub.
Sərgi öncəsi rəssamın həyat və yaradıcılığını əks etdirən videoçarx nümayiş olunub. Beynəlxalq Qalereyanın direktoru Elnurə İsgəndərova çıxış edərək qonaqları salamlayıb və Rəşid Əzimovun sənət yoluna dair geniş məlumat verib. O, rəssamın müxtəlif texnikalarda yüksək ustalıqla yaratdığı möhtəşəm əsərlərin Azərbaycan incəsənətində özünəməxsus yer tutduğunu vurğulayıb.
Tədbirdə mərhum rəssamın ailə üzvləri – atası Misirxan Əzimov, qardaşı Yaşar Əzimov, bacısı Fatma Səlimova, kürəkəni Fuad Səlimov, bacısı Könül Əzimova və digər qonaqlar iştirak edərək onun xatirəsini sevgi ilə yad ediblər. Onlar Rəşid Əzimovun əsərlərini bu gün də böyük maraqla izlədiklərini bildiriblər.
Qeyd edək ki, Rəşid Əzimov 1980-ci ildə Sumqayıt şəhərində dünyaya göz açıb, lakin 1997-ci ildə gənc yaşında həyatdan ayrılıb. Onun yalnız ömrü deyil, bir çox əsərləri və arzuları da yarımçıq qalmışdır. Buna baxmayaraq, sənətkarın işıqlı irsi bu gün də incəsənətsevərlərin qəlbində yaşayır.
Aygün Oqtay
