“Sahibkar cinayətkar kimi yox, iqtisadiyyatın dayağı kimi görülməlidir; Valyutanın qaytarılmamasına görə cinayət məsuliyyətinin ləğvi sahibkarlıq azadlığını genişləndirsə də, bank kreditlərinə çıxış, ağır girov tələbləri və sənədləşmədəki formal “bir pəncərə” sistemi hələ də ciddi maneə olaraq qalır”.
Avropa.info xəbər verir ki, bu barədə ölkədə biznes mühitinin liberallaşdırılması, Cinayət Məcəlləsində edilən son mühüm dəyişikliklər, kənd təsərrüfatının inkişafı ilə bağlı qəbul edilən 6 milyardlıq proqram və sahibkarların qarşılaşdığı bürokratik əngəlləri Sosdem.az-a şərh edərkən Milli Cəbhə Partiyanın (MCP) sədri, deputat Razi Nurullayev bəyan edib.
“Müasir Biznes Bir Ölkə Daxilində Aparılmır, Hər Maliyyə Hərəkətini Cinayət Müstəvisinə Çəkmək Sahibkarın Riskini Artırırdı”
Millət vəkilli Cinayət Məcəlləsinin 208-ci maddəsinin ləğvinin sahibkarlığın inkişafı baxımından mühüm hadisə olduğunu diqqətə çatdırıb:
“Müasir biznes artıq yalnız bir ölkə daxilində aparılmır. Sahibkar mal ixrac edir, xaricdə tərəfdaşla işləyir, logistika xərci ödəyir, yeni bazara daxil olur və bəzən vəsaiti xaricdə saxlamaq məcburiyyətində qalır ki, növbəti müqaviləni yerinə yetirə bilsin. Belə vəziyyətdə hər gecikməni və ya hər maliyyə hərəkətini dərhal cinayət müstəvisinə çəkmək sahibkarın riskini artırır, onun qərarvermə azadlığını məhdudlaşdırırdı. Bu baxımdan 208-ci maddənin ləğvi sahibkarlığın və sahibkarın inkişafı baxımından mühüm hadisədir. Bu dəyişiklik yalnız bir maddənin ləğvi kimi yox, sahibkara münasibətin yumşalması kimi qəbul edilməlidir. Əgər pozuntu varsa, ilk növbədə maliyyə nəzarəti, vergi mexanizmləri və inzibati tədbirlər işləməlidir. Cinayət məsuliyyəti isə ən son vasitə olmalıdır”.
“Dövlət Ciddi Addımlar Atır, Lakin Bank Kreditləri, Yüksək Faizlər və Ağır Girov Tələbləri Qalmaqdadır”
MCP lideri dövlətin son illərdə həyata keçirdiyi müsbət islahatları sadalamaqla yanaşı, real sektorda hələ də həllini tapmayan fundamental sosial-iqtisadi problemləri vurğulayıb:
“Dövlət son illərdə sahibkarlığın inkişafı üçün ciddi addımlar atıb. Vergi inzibatçılığının sadələşdirilməsini, biznesə münasibətdə elektron xidmətlərin genişləndirilməsini, qeyri-neft ixracının təşviqini, KOB-lara dəstək mexanizmlərini və kənd təsərrüfatının inkişafı ilə bağlı 6 milyardlıq proqramın qəbul edilməsini müsbət qiymətləndirirəm. Bununla belə, sahibkar hələ də xeyli problemlə üz-üzədir: bank kreditlərinə çıxış çətindir, faizlər yüksəkdir, girov tələbləri ağırdır. Bəzi yoxlamalar və icazə prosedurları biznes üçün əlavə yük yaradır, məhkəmə müdafiəsinə inam hər zaman yetərli deyil, region sahibkarı ilə paytaxt sahibkarının imkanları eyni səviyyədə deyil”.
“Bir Pəncərə’ Sistemi Formal Xarakter Daşıyır, Sənədləşmə Tam Rəqəmsallaşmalıdır”
Deputat biznes obyektlərinin yaradılması zamanı yerli qurumların yaratdığı bürokratik əngəlləri tənqid edərək beynəlxalq təcrübəyə əsaslanan çıxış yollarını təklif edib:
“Təcrübədən görürük ki, sahibkarlığın inkişafı üçün yalnız cəza mexanizmlərini yumşaltmaq kifayət deyil. Biznes obyektlərinin yaradılması və genişləndirilməsi zamanı sənədləşmə prosesi hələ də şəffaf və sürətli deyil. ‘Bir pəncərə’ sistemi formal olaraq mövcuddur, amma sahibkar yenə də müxtəlif qurumların qapısını döyməli olur. Torpaq, çıxarış, təyinat, tikinti icazəsi, kommunikasiya, yanğın və sanitariya rəyləri bəzən aylarla, hətta illərlə uzanır. Sahibkar investisiya qoymaq, iş yeri yaratmaq istəyir, amma sənəd yükü onun qarşısında maneəyə çevrilir. Ona görə də sənədləşmə prosesi tam rəqəmsallaşmalı, müddətlər qanunla məhdudlaşdırılmalı və hər qurumun məsuliyyəti aydın müəyyən edilməlidir. Avropa ölkələrində, Gürcüstan və Qazaxıstanda sahibkarın valyutanı harada saxlamasından çox, əməliyyatın şəffaflığına və riskəsaslı nəzarət modelinə üstünlük verilir. 208-ci maddənin ləğvi müsbət addımdır, lakin real effekt o zaman olacaq ki, dövlət qurumları biznesə tərəfdaş kimi yanaşsın. Sahibkar nə qədər rahat nəfəs alarsa, ölkə iqtisadiyyatı da bir o qədər güclü olar”
