Qida təhlükəsizliyi hər bir insanın gündəlik həyatına birbaşa toxunan məsələlərdəndir. Ona görə də yeni Dövlət Proqramını yalnız növbəti dövlət sənədi kimi deyil, insanların süfrəsində olan qidanın daha təhlükəsiz olması baxımından qiymətləndirmək lazımdır.

Avropa.info xəbər verir ki, bunu Sosdem.az-a açıqlamasında Milli Cəbhə Partiyasının (MCP) başqanı, deputat Razi Nurullayev deyib.

“Qida Nəzarəti Riskə Əsaslanmalıdır…”

MCP başqanı riskli məhsullar və nəzarət mexanizmlərinin mahiyyəti barədə bildirib:

“Hansı məhsulların daha riskli olmasına gəlincə, bunu yalnız məhsulun yerli və ya xarici olması ilə əlaqələndirmək düzgün deyil. Ət və süd məhsulları, balıq, yumurta, həmçinin pestisid və digər kimyəvi maddələrin istifadəsi ilə bağlı bitkiçilik məhsulları daha ciddi nəzarət tələb edən sahələrdir. Əsas məsələ məhsulun necə istehsal edilməsi, saxlanması, daşınması və satışa çıxarılmasıdır. İdxal məhsullarında da, yerli istehsalda da risklər ola bilər. Buna görə nəzarət mənşəyə görə deyil, riskə əsaslanmalıdır. Dövlət Proqramının üstün tərəfi də məhz bu yanaşmanın gücləndirilməsidir”.

“Onlayn Qida Satışında Risklər…”

Millət vəkili müasir analiz imkanlarının və yeni satış sahələrinin nəzarətə götürülməsinin vacibliyini qeyd edib:

“Laborator nəzarətin genişləndirilməsi və müasir analiz imkanlarının artırılması nəzərdə tutulur. Onlayn qida satışının genişlənməsi ilə yaranan risklər də proqramda nəzərə alınıb. Xüsusilə məhsulların saxlanması, daşınması, temperatur rejimi, etiketlənməsi və son istifadə müddəti kimi məsələlərə nəzarətin gücləndirilməsi vacibdir”

“Hədəf cərimə yazmaq deyil…”

Parlamentari cəza tədbirlərindən ziyadə real nəticənin önəmini xüsusi vurğulayıb:

“Məncə, burada əsas hədəf cərimə yazmaq və ya sahibkarı cəzalandırmaq deyil. Məqsəd həm istehsalçını məsuliyyətli davranmağa təşviq etmək, həm də vətəndaşın aldığı məhsula güvənməsini təmin etməkdir. İnsan mağazadan və ya internetdən qida alanda onun təhlükəsiz olduğuna əmin olmalıdır. Yeni proqramın uğuru da məhz bununla ölçüləcək: kağız üzərində nə qədər tədbir yazıldığı ilə yox, vətəndaşın gündəlik həyatında qida təhlükəsizliyinin nə qədər yaxşılaşdığı ilə ölçüləcək”.