Pakistanın Hayber Paxtunxva əyalətində polis nəzarət-buraxılış məntəqəsinə edilən hücumda 9 polis əməkdaşı həlak olub, 28 polis əməkdaşı yaralanıb.
Avropa.info bildirir ki, Dawn qəzetinin xəbərinə görə, polis rəsmilərinin açıqlamalarına əsaslanaraq, dünən Hayber Paxtunxvanın Hanqu rayonunda polis nəzarət məntəqəsinə hücum olub.
Pakistan Talibanının (TTP) həyata keçirdiyi hücumda 9 polis məmuru həyatını itirib, 28 polis əməkdaşı yaralanıb.
Təhlükəsizlik qüvvələrinin hücuma reaksiyası nəticəsində 15 silahlı yaraqlı zərərsizləşdirilib.
Pakistanın terror problemi
Pakistanda silahlı hücumlar xüsusilə Əfqanıstanla həmsərhəd olan Hayber Paxtunxva və Bəlucistan əyalətlərində cəmləşib.
Hər iki əyalətdə puştun və bəluc etnik qruplarının hüquqlarını müdafiə etdiklərini iddia edən silahlı qruplar Pakistan təhlükəsizlik qüvvələrinə və mülki şəxslərə hücum edir.
İslamabad Pakistan Talibanının (TTP) Əfqanıstanda yerləşdiyini və oradan hücumlar təşkil etdiyini iddia etsə də, Əfqanıstan administrasiyası bu iddiaları rədd edir.
Bəlucistanda Bəlucistan Azadlıq Ordusunun (BLA) hücumları ön plana çıxır. BLA, Bəlucistan əyalətinin Pakistandan ayrılmasını və bu bölgəyə Bəluc xalqının hakim olmasını istəyir.
