Fransa Prezidenti Emmanuel Makron ölkədə davam edən güclü meşə yanğınları ilə əlaqədar silahlı qüvvələrin səfərbər olunması barədə göstəriş verib.
Avrop.info xəbər verir ki, Makron hökumətə idarələrarası böhran mərkəzinin və ordunun imkanlarından istifadə etməklə yanğınlarla mübarizənin gücləndirilməsi tapşırığını verib.
O, həmçinin Avropa Komissiyasından Aİ-nin mülki müdafiə mexanizminin işə salınmasını istəyib. Bu çərçivədə Fransanın cənub-qərbinə üç yanğınsöndürmə təyyarəsi və iki helikopter göndərilib.
Qeyd edək ki, Jironda departamentində davam edən yanğın son 50 ildə Fransada baş verən ən dağıdıcı meşə yanğınlarından biri kimi qiymətləndirilir. Yanğın nəticəsində 110 minə yaxın insan təxliyə edilib. Alovun əhatə etdiyi ərazi 14 min hektarı ötüb.
Fransanın cənub-qərbində baş verən böyük meşə yanğınları xüsusilə Atlantik sahillərində yerləşən Kap Ferret yarımadasını təhdid edib. Hakimiyyət ərazinin tamamilə boşaldılması barədə qərar verib.
