ABŞ kəşfiyyat orqanları hesab edir ki, İranın yeni Ali Lideri Müctəba Xamenei nüvə silahının hazırlanmasında atası, mərhum Ayətullah Əli Xameneidən daha maraqlıdır.
Avrop.info xəbər verir ki, bu barədə “The New York Times” qəzeti məsələ ilə tanış olan ABŞ rəsmilərinə istinadən məlumat yayıb.
Bildirilir ki, ABŞ kəşfiyyatı Müctəba Xameneinin rəhbərliyi altında formalaşan daha mühafizəkar hakimiyyətin nüvə silahı əldə etmək niyyətində olduğunu ehtimal edir. Onların əldə etdiyi məlumata əsasən, İran ötən ilin iyununda ABŞ-ın zərbə endirdiyi nüvə obyektlərindən uranın zənginləşdirilməsi üçün istifadə olunan sentrifuqaların bir hissəsini ölkənin mərkəzində yerləşən Pikaks dağındakı möhkəmləndirilmiş yeraltı kompleksə köçürüb. Bu isə Tehranın uranın zənginləşdirilməsi imkanlarını qorumağa çalışmasının göstəricisi kimi qiymətləndirilə bilər. ABŞ rəsmiləri yüksək zənginləşdirilmiş uran ehtiyatı da daxil olmaqla, nüvə proqramının əsas komponentlərinin hələ də İranın nəzarətində qaldığını qeyd edir.
