İranın ABŞ ilə gərginliyi azaltmaq və diplomatik danışıqlara başlamaq istəyi, həmçinin hər iki tərəfdən gələn müsbət siqnallar regionda yeni siyasi prosesin başladığını göstərir. İran Prezidenti Məsud Pezeşkianın BMT Baş Assambleyasında iştirak etmək üçün ABŞ-yə səfəri və Donald Trampın onunla görüş ehtimalı iki ölkə arasındakı təmasların intensivləşdiyini təsdiqləyir.
Avropa.info xəbər verir ki, bunu Sosdem.az-a açıqlamasında Milli Cəbhə Partiyasının (MCP) başqan müavini, politoloq Məhəmməd Əsədullazadə ABŞ-İran münasibətlərindəki son diplomatik dinamikanı şərh edərkən bildirib.
“İran Danışıqlara Can Atır, Amma SEPAH…”
Ekspert Tehranın diplomatik gedişlərini və daxili güc balansı məsələsini diqqətə çatdırıb:
“İran müəyyən mənada ABŞ-dən qarşılıqlı təmkin və gərginliyin azaldılmasını istəyir. Bundan sonra danışıqlara başlayaraq atəşkəsə və sülhə nail olmağa çalışır. ABŞ Prezidenti Donald Tramp da İranın ABŞ ilə danışmağa can atdığını bildirir. Bu da göstərir ki, İran həqiqətən də ABŞ ilə diplomatik danışıqlarda maraqlıdır. Pezeşkian BMT-də çıxış etmək üçün ABŞ-yə yola düşüb və Tramp onunla görüşə biləcəyini bildirib. Bundan əvvəl tərəflər arasında İslamabad memorandumu imzalanmışdı. Bununla belə, hesab edirəm ki, tərəflər bu mərhələdə SEPAH-ın qarşısını almağa çalışa bilər. Çünki SEPAH İran prezidentinin siyasi mövqeyinin və reytinqinin yüksəlməsində maraqlı deyil”.
“Görüş Baş Tutsa Belə…”
Şərhçi xarici siyasətdəki qərarvermə mexanizmlərinə toxunaraq, mümkün görüşün mahiyyətini təhlil edib:
“Görüş baş tutsa belə, onun dərhal həlledici nəticə verəcəyini düşünmürəm. Bu, daha çox tərəflərin mövqelərini birbaşa çatdırması baxımından əhəmiyyətli olan siyasi görüş ola bilər. Çünki İranda xarici siyasət və təhlükəsizlik məsələləri ilə bağlı qərarların qəbulunda SEPAH əsas güc mərkəzidir”.
“Gərginlik Noyabrın Sonuna Qədər Davam Edə Bilər”
MCP rəsmisi proseslərin yaxın gələcəkdəki inkişaf ssenarisini də proqnozlaşdırıb:
“Hesab edirəm ki, ABŞ və İran arasında qarşıdurmanın ən azı noyabr ayının sonlarına qədər davam etməsi mümkündür. ABŞ hələlik İranın irəli sürdüyü şərtləri qəbul etməyəcək və tərəflər arasında danışıqların nəticəyə çevrilməsi üçün kifayət qədər ciddi fikir ayrılıqları qalacaq. Amma ciddi hərbi eskalasiya gözlənilmir”.
