Kiyev Donald Tramp administrasiyasına qeyri-rəsmi şəkildə bildirib ki, Rusiya 2027-ci ildə belə Donetsk vilayətinin bütün ərazisini ələ keçirə bilməyəcək.

Avropa.info xəbər verir ki, bu barədə jurnalistlərin tanış olduğu sənədə istinadən “Kiyev İndependent” nəşri yazıb.

Ukraynanın Vaşinqtondakı səfirliyinin Tramp administrasiyasına təqdim etdiyi sənəddə qeyd olunur ki, Rusiya ordusunun irəliləmə tempi ayda 100 kvadrat kilometrdən də aşağı düşüb. Ukrayna hələ də Donetsk vilayətinin ərazisinin təxminən 21–22%-nə nəzarət etdiyinə görə, bu temp saxlanılarsa, Moskvanın elan etdiyi məqsədlərə nail olması “potensial olaraq” 2027-ci ildən sonraya qədər uzana bilər.

Nəşrin fikrincə, Kiyevin Vaşinqtonla bölüşdüyü bu hesablama ABŞ administrasiyasını Ukrayna ərazilərinin könüllü şəkildə verilməməsi halında Rusiyanın onları hərbi yolla ələ keçirə biləcəyi barədə mövcud fərziyyəni nəhayət şübhə altına almağa vadar etməlidir.

Ağ Evdəki adı açıqlanmayan bir məmur administrasiyanın Ukraynanın bu qiymətləndirməsini aldığını təsdiqləyib:

“Prezident və onun komandası, əvvəlki kimi, Rusiya ilə Ukrayna arasındakı müharibənin dayandırılmasında konstruktiv rol oynamağa sadiqdir və o, nəticədə sülh razılaşmasına nail olacağımıza dair nikbinliyini qoruyur”.

Sənəddə həmçinin xəbərdarlıq edilir ki, Kreml qarşılaşdığı çətinlikləri kompensasiya etmək üçün ordusuna müqaviləli hərbçilərin cəlb edilməsi kampaniyasını gücləndirə və sentyabr seçkilərindən sonra, hətta 500 min nəfərədək məcburi səfərbərlik elan edə bilər.

Bu, Rusiya ordusunun cəbhədə yüksək itkilər verdiyi bir şəraitdə baş verə bilər. Sənəddə yer alan Ukrayna məlumatlarına görə, yalnız iyul ayında Rusiyanın itkiləri təxminən 42,8 min nəfər təşkil edib.

Sənəddə Ukraynanın Rusiyaya qarşı uzaqmənzilli zərbələr kampaniyasının nəticələri də ətraflı təsvir olunur. Xüsusilə qeyd edilir ki, Rusiyanın neft infrastrukturuna endirilən zərbələr ölkənin neft emalı gücünü 30%-dən çox azaldıb, iqtisadi itkilər isə təxminən 15 milyard dollar qiymətləndirilir. Ukrayna həmçinin Qara və Azov dənizlərində Rusiyanın “kölgə donanması” ilə əlaqəli təxminən 200 gəmiyə hücum edib.

Bununla yanaşı, sənəddə ABŞ rəhbərliyinə Ukraynada “Patriot” hava hücumundan müdafiə sistemləri üçün raket-ələ keçiricilərin kəskin çatışmazlığı barədə xəbərdarlıq edilir.