“İsraildə qondarma “erməni soyqırımı”nın tanınması ilə bağlı təşəbbüsün dondurulması təkcə bir diplomatik epizod deyil. Bu, Prezident İlham Əliyevin son illərdə formalaşdırdığı çoxvektorlu xarici siyasət kursunun, balanslaşdırılmış diplomatiya modelinin və milli maraqlara söykənən strateji xəttin növbəti uğurlu nəticəsidir. Rəsmi Bakı bu prosesdə bir daha göstərdi ki, Azərbaycan fərqli geosiyasi baxışlara, müxtəlif regional prioritetlərə və zaman-zaman bir-biri ilə ziddiyyət yaşayan maraqlara malik tərəflərlə münasibətlərini qorumağı, eyni zamanda öz milli maraqlarını prinsipial şəkildə müdafiə etməyi bacarır”.
Bunu Avropa.info-ya açıqlamasında Milli Məclisin deputatı Sadiq Qurbanov deyib.
Onun sözlərinə görə, bu diplomatik uğur bir daha sübut etdi ki, Prezident İlham Əliyevin rəhbərliyi ilə həyata keçirilən xarici siyasət kursu yalnız münasibətlər qurmaq yox, həm də mürəkkəb siyasi böhranları tərəflərdən heç biri ilə münasibətləri zədələmədən idarə etmək gücünə malikdir. “İsraildə belə həssas təşəbbüsün dayandırılması da məhz bu diplomatik xəttin məhsuludur”, – deyə o vurğulatyıb.
Deputat hesab edir ki, İsraildə “erməni soyqırımı” təşəbbüsünün dayandırılması da bu çoxvektorlu siyasətin praktik nəticəsidir: “Bakı həm Türkiyənin həssas olduğu məsələ ilə bağlı prinsipial mövqe ortaya qoydu, həm də bunu İsraillə münasibətləri zədələmədən etdi”.
O əlavə edib ki, bu hadisədə diqqət çəkən əsas məqam Azərbaycanın seçdiyi diplomatik davranış modeli oldu. “Rəsmi Bakı nə məsələni emosional ritorika səviyyəsinə endirdi, nə də onu açıq diplomatik böhrana çevirdi. Yəni Bakı öz etirazını qarşıdurma dili ilə deyil, strateji arqumentlərlə, siyasi çəkisini ortaya qoymaqla və münasibətlərin həssas məqamlarını xatırlatmaqla ifadə etdi. Bu, Prezident İlham Əliyevin diplomatiyasının ən mühüm cəhətləri də budur: milli maraqlar müdafiə olunur, amma münasibətlər yandırılmır; prinsipial mövqe sərgilənir, amma körpülər dağıdılmır; nəticə əldə olunur, amma tərəflərdən heç biri açıq itirən tərəfə çevrilmir. Bakının bu məsələdə atdığı addımlar bir daha göstərdi ki, Prezident İlham Əliyevin qurduğu xarici siyasət modeli qardaşlıq və strateji tərəfdaşlıq arasında seçim etmir, əksinə onları uzlaşdırır. Azərbaycan Türkiyənin milli maraqlarına toxunan bir məsələ qarşısında susmadı, prinsipial mövqe tutdu və prosesə müdaxilə etdi. Eyni zamanda, bunu elə etdi ki, İsraillə münasibətlərə zərbə dəymədi, tərəflər arasında əlavə gərginlik yaranmadı və əməkdaşlıq platforması qorundu.
Bu, sadəcə diplomatik manevr deyil, ciddi siyasi ustalıqdır. Çünki bugünkü mürəkkəb beynəlxalq şəraitdə bir-biri ilə fərqli baxışlara malik olan, bəzən eyni məsələyə tamamilə zidd mövqedən yanaşan tərəflərlə münasibətləri eyni anda qorumaq və onların arasında etibarlı aktor olaraq qalmaq asan məsələ deyil. Azərbaycan isə bunu bacardığını növbəti dəfə nümayiş etdirdi”, – o vurğulayıb.
S. Qurbanov onu da qeyd edib ki, İsraildə təşəbbüsün dondurulması həm də Azərbaycanın regionda yalnız tərəf seçən yox, həm də sabitləşdirici və tarazlayıcı rol oynayan aktor olduğunu göstərdi:
“Bu hadisə bir daha göstərdi ki, Prezident İlham Əliyevin xarici siyasət xətti mürəkkəb regional və qlobal şərtlər daxilində Azərbaycanın maraqlarını qorumağa, eyni zamanda müxtəlif güc mərkəzləri ilə münasibətləri saxlamağa imkan verir. Məhz buna görə də İsraildə təhlükəli təşəbbüsün dayandırılması təkcə bir diplomatik nəticə yox, Prezident İlham Əliyev diplomatiyasının siyasi çəkisinin, balans siyasətinin və milli maraqları səssiz, amma qətiyyətlə təmin etmək bacarığının daha bir təsdiqi kimi qiymətləndirilməlidir”.
Avropa.info
