“Azərbaycanda kəndlərin boşalması artıq sadəcə sosial məsələ deyil, milli təhlükəsizlik və ərzaq müstəqilliyi ilə bağlı strateji problemdir. Gəncləri kənddə saxlamaq çağırışlarla yox, yalnız real iqtisadi və sosial üstünlüklər yaratmaqla mümkündür. Dövlət kənddə yaşayan ailələrə xüsusi güzəştlər paketi təqdim etməli və təcili olaraq ‘Kəndlərin İnkişafı üzrə Dövlət Proqramı’ qəbul olunmalıdır”.
Avropa.info xəbər verir ki, bunu Sosdem.az-a kəndlərdən şəhərlərə miqrasiyanın fəsadlarını, regionlarda gənclər üçün imkanların azlığını və kənd təsərrüfatının dirçəldilməsi yollarını şərh edərkən Milli Məclisin Aqrar siyasət komitəsinin sədr müavini, Milli Cəbhə Partiyasının (MCP) başqanı Razi Nurullayev deyib.
“Kənddə Yaşayan İnsana Dolanışıq Və İş Lazımdır”
Deputat kənd insanının üzləşdiyi əsas iqtisadi çətinlikləri və gənclərin köç səbəblərini diqqətə çatdırıb:
“Biz gəncləri daha yaxşı həyat və sabit gəlir axtardıqları üçün qınaya bilmərik. Bu gün kənddə iş yerləri məhduddur, sosial-mədəni mühit zəifdir. Hətta dağ kəndində yaşayan bir ağsaqqalın dediyi ‘Mənə təmiz hava yox, pul lazımdır’ sözləri bu acı reallığı tam ifadə edir. Şəhərin ekoloji yükünü azaldan, ölkənin ərzaq təhlükəsizliyini təmin edən kənd sakini dövlət tərəfindən xüsusi dəstəklənməlidir. Kənddə daimi yaşayan ailələr üçün kommunal xərclərdə (qaz, işıq, su) güzəştlər tətbiq edilməli, kənddə ev tikmək istəyən gənclərə güzəştli ipoteka və biznes qrantları verilməlidir”.
“Kompleks Dəstək Mexanizmləri Qəbul Edilməlidir”
Millət vəkili kəndlərdə emal sənayesinin qurulmasının və mütəxəssislərin təşviq edilməsinin vacibliyini vurğulayıb:
“Kənd yalnız əkin sahəsi deyil, iqtisadiyyatın drayveridir. Kəndlərdə emal müəssisələri, aqroparklar və logistika mərkəzləri yaradılmalıdır ki, kəndli məhsulunu emal edib daha çox gəlir qazana bilsin. Həmçinin kənddə çalışan müəllim, həkim, aqronom və baytarlar üçün əlavə əməkhaqqı və mənzil proqramları genişləndirilməlidir. Hazırlanacaq ‘Kəndlərin İnkişafı üzrə Dövlət Proqramı’ güzəştli kreditləri, rəqəmsal təhsili, yüksək sürətli interneti və sosial infrastrukturu özündə birləşdirməlidir. Gənc şəhərə köçməyi deyil, kənddə qalmağı özü üçün daha sərfəli seçim hesab etməlidir”.
