Azərbaycanın Avropaya və Qərb dəyərlərinə etimadsızlığının kökündə dayanan tarixi yaddaş, çoxəsrlik qarşıdurmalar və Qərbin türk-İslam dünyasına münasibətdə nümayiş etdirdiyi ikili standartlar müasir geosiyasi reallıqların əsasını təşkil edir. Qərb uzun illərdir ki, demokratiya və insan hüquqları adı altında öz siyasi, iqtisadi və geosiyasi maraqlarını “əqli işğal” vasitəsilə ixrac etməyə çalışır.
Avropa.info xəbər verir ki, bunu Sosdem.az-a açıqlamasında Milli Cəbhə Partiyasının (MCP) başqan müavini, siyasi analitik Vüqar Dadaşov deyib.
“Avropa Dəyərləri Və Universallıq Ziddiyyəti”
Politoloq Qərbin dəyərlər sisteminin universallığı iddiasının praktikada necə iflasa uğradığını konkret nümunələrlə diqqətə çatdırıb:
“Qərbin türk-İslam dünyasına münasibətində dəyərlər deyil, siyasi təsir vasitələri əsas rol oynayır. Türkiyənin onilliklər ərzində Avropa İttifaqı qapısında saxlanılması Avropa dəyərlərinin elan edilən universallığına praktik ziddiyyətdir. Eyni zamanda, Qərb tərəfindən təqdim edilən fərdiləşmə, əxlaqi azadlıq kimi anlayışlar Azərbaycanın milli, dini və mənəvi dəyərləri ilə eyniləşdirilə bilməz. CNN, BBC kimi qlobal media qurumları Qərbin siyasi gündəminin qəbuluna xidmət edir. Əgər Qərbdə söz azadlığı universal prinsipdirsə, Julian Assange-a qarşı siyasi təzyiqlərin adı nədir?! Azərbaycan Prezidenti İlham Əliyevin BBC-yə müsahibəsi Qərb media qurumlarının və Avropanın riyakar üzünü ifşa etdi”.
“Qarabağ Məsələsi Qərb Riyakarlığının Ən Ağır Nümunəsidir”
Şərhçi Qərbin Qarabağ münaqişəsi dövründəki fəaliyyətsizliyini və işğalçı Ermənistana münasibətini sərt tənqid edib:
“Qərb riyakarlığının ən bariz nümunəsi Qarabağ məsələsi idi. Ermənistan ABŞ, Fransa, Rusiya və İranın köməyi ilə Azərbaycan ərazilərini 30 il işğalda saxladı. BMT Təhlükəsizlik Şurasının dörd qətnaməsinə baxmayaraq, Qərb Ermənistana heç bir təsir göstərmədi. Bir milyondan çox azərbaycanlı qaçqın və məcburi köçkünün hüquqları Qərbin siyasi gündəmində bu gün Qarabağdan köçmüş bir ovuc erməninin hüquqları qədər prioritet olmadı. Əksinə, ATƏT-in Minsk qrupu Azərbaycanı işğalla barışdırmağa məcbur edirdi. Azərbaycan öz gücünə suverenliyini tam bərpa etdikdən sonra artıq regionun söz sahibinə çevrilib və orta güc statusuna yiyələnib. İndi Azərbaycan Qərb siyasətinə qarşı yalnız bəyanat vermir, Avropa institutlarının qətnamələrini rədd edir”.
“Qlobal Münaqişələrin Arxasında Dayanan Maraqlar”
MCP rəsmisi Qərbin İranın nüvə proqramına və Rusiya-Ukrayna müharibəsinə münasibətindəki geosiyasi maraqları da təhlil edib:
“Qərb riyakarlığı İranın nüvə proqramı məsələsində də özünü göstərir. Şah Pəhləvi dövründə bu proqrama dəstək verən Qərb, bu gün İranı təhlükə kimi təqdim edir. Çünki hazırkı İran Şah kimi sözə baxan deyil. ABŞ-İran müharibəsi yalnız nüvə proqramı ilə bağlı deyil; ABŞ öz geosiyasi və iqtisadi maraqları naminə bütövlükdə regionun iqtisadiyyatını, Körfəz ölkələrinin enerji infrastrukturunu və dünya enerji bazarlarını daha dərin təsir dairəsinə salmağa çalışır. Rusiya-Ukrayna müharibəsinin də arxasında enerji, iqtisadi resurslar, geosiyasi üstünlük və dünya iqtisadiyyatına nəzarət uğrunda mübarizə dayanır. Rusiya da bu arada öz ruslaşdırma siyasətinə fürsət kimi, qeyri-slavyan xalqlarını, xüsusən də türk-müsəlmanları amansız qırğına verir”.
“Azərbaycanın Gələcək Strateji İstiqaməti”
Başqann müavvini Azərbaycanın xarici siyasət prioritetlərinin Türk-İslam dünyasına yönəlməsinin tarixi və strateji zərurət olduğunu vurğulayıb:
“Bu reallıqlar fonunda Azərbaycanın öz türk-İslam xarici siyasət istiqamətini müəyyən etməsi dövlətçilik, milli kimlik və təhlükəsizlik prinsiplərinə tam uyğundur. Prezident İlham Əliyev andiçmə mərasimində Azərbaycanın yolunun Türk dünyası ilə bağlı olduğunu açıq şəkildə bəyan etdi. Türkiyə ilə Şuşa Bəyannaməsi əsasında müttəfiqlik münasibətlərinin möhkəmləndirilməsi, Türk Dövlətləri Təşkilatında fəal siyasət, İslam dünyası ilə əlaqələrin genişləndirilməsi, Türkiyə-Pakistan-Səudiyyə Ərəbistanı xəttində yeni regional əməkdaşlıq mexanizmlərinin meydana çıxması Azərbaycanın gələcək geosiyasi istiqamətini daha aydın göstərir. Məsələ Qərblə əlaqələri kəsmək deyil, Qərbin təqdim etdiyi modelləri milli prioritetlərin üzərinə qoymamaqdır. Azərbaycan üçün Türk-İslam dünyası yalnız siyasi seçim deyil, tarixi yaddaşın, milli kimliyin və strateji maraqların birləşdiyi geosiyasi reallıqdır. Azərbaycanın cavabı Qərbdən uzaqlaşmaq deyil, öz milli maraqlarını üstün tutmaqdır”.
