Qubadlı Rayon İcra Hakimiyyətinin təşkilatçılığı ilə Sumqayıt şəhəri 28 May Mədəniyyət evində tanınmış həkim, xeyriyyəçi, şair Mir Məhəmməd Mir Sədi oğlunun 80 illik yubileyinə həsr olunmuş “Nurla yazılmış bir ömür” adlı tədbir keçirilib.
Avropa.info xəbər verir ki, tədbirdə Qubadlı rayon İcra Hakimiyyətinin başçısı Malik İsaqov, Millət vəkilləri Tahir Mirkişili, Ceyhun Məmmədov, hüquq-mühafizə orqanları, RİH-in məsul işçiləri, idarə, müəssisə və təşkilat rəhbərləri, həkimlər, yazıçılar, şairlər, Mir Məhəmməd Mir Sədi oğlunun yaxınları və ictimaiyyət nümayəndələri iştirak ediblər.
Tədbir iştirakçıları ilk öncə Mir Məhəmməd Mir Sədi oğlunun və Şəhidlərimizin əziz xatirəsini bir dəqiqəlik sükutla yad ediblər.
Qubadlı Rayon İcra Hakimiyyətinin başçısı Malik İsaqov tədbirdə çıxış edərək qeyd edib ki, istedadlı həkim, xeyriyyəçi, şair və mənəvi kamilliyi ilə tanınan Mir Məhəmməd Mir Sədi oğlunun 80 illik yubileyi ilə əlaqədar onu ehtiramla yad etmək, həyat yoluna nəzər salmaq böyük bir mənəvi borcdur. O, ömrünü insanlara şəfa verməyə, sözlə könüllərə işıq salmağa və xeyirxah əməllərlə yadda qalmağa həsr etmiş nadir şəxsiyyətlərdən biri kimi xatırlanır.
Həkim kimi fəaliyyəti onun həyatının ən parlaq səhifələrindən biri olmuşdur. O, tibb sahəsini yalnız peşə kimi deyil, bir xidmət, bir ibadət kimi qəbul edirdi. Onun üçün xəstə yalnız müalicə olunmalı bir insan deyil, qayğıya və ümidə ehtiyacı olan bir can idi. Şəfqəti, səbrli yanaşması və yüksək peşəkarlığı sayəsində yüzlərlə insanın həyatında silinməz iz qoymuş, saysız ailələrə sevinc bəxş etmişdir. İnsanlar onu yalnız həkim kimi deyil, həm də dərd ortağı, məsləhətçi və mənəvi dayaq kimi xatırlayırlar.
Tədbirdə çıxış edən Seyid Mir Paşa ağa ocağının ləyaqətli davamçısı İkram Ziyadov, Milli Məclisin deputatı Tahir Mirkişili, TƏBİB-in Tibbi təhsil və innovasiyalar departamentinin rəhbəri Teymur Mirzəbəyli, Rusiyada yaşayan iş adamı, diplomat, yazışı, tərcüməçi Zahid Şahsuvarov, həkimlər Asif Kalbalıyev, İbrahim İsmayılov, İsmayıl Quliyev və oğlu Mir Sədi Mirlər Mir Məhəmməd Mir Sədi oğlunun həyatından, xidimətlərindən söz açaraq öz xatirələrini bölüşüblər.
Tədbirdə qiraətçilərin, tanınmış musiqiçilərin ifasında şeirlər, muğam parçaları səsləndirilib.
Qeyd edək ki, Mir Məhəmməd Mir Sədi oğlu 1946-cı il fevral ayının 18-də Qubadlı rayonunun Mirlər kəndində, Şeyx Mir Sədi ağa ocağında dünyaya göz açıb. Körpə ikən anasını itirmiş, iki yaşında isə atasını üçüncü dəfə həbs etmişlər. Mir Məhəmməd Mir Sədi oğlunu rayonun Çərəli kəndindəki yaxın qohumları Şahsuvar baba və Züleyxa nənə müvəqqəti himayəyə götürüb, əzizləyib saxlamışlar.
Mir Sədi Ağa həbsdən qayıdandan sonra sevimli oğlunu evinə gətirmiş və onun tərbiyəsi ilə özü məşğul olmuşdur. O, 1962-ci ildə Dondarlı kənd orta məktəbini bitirmiş, elə həmin ildə Azərbaycan Tibb Institutuna qəbul olmuşdur. 1968-ci ildə institutun müalicə-profilaktika fakultəsini bitirmişdir.
Bir müddət Çardaxlı və Xocahan kəndlərindəki tibb müəssisələrinə başçılıq etdikdən sonra Qubadlı rayon Mərkəzi xəstəxanasında həkim kimi fəaliyyətini davam etdirmişdir. Mir Məhəmməd ağa gözəl həkim, kəramətli seyid kimi hamının hörmətini qazanmışdır. Həmişə onun amalı xalqına xidmət etmək, xeyirxah işlər görmək və qurub yaratmaq olmuşdur. Mir Məhəmməd ağa da atası Mir Sədi Ağa kimi həmişə elinə-obasına sadiq qalmış, onların bütün problemlərinin həllində yaxından iştirak etmişdir.
1982- il may ayının 15-i avtomobil qəzasına düşərək faciəli şəkildə dünyasını dəyişib. Mir Məhəmməd Mir Sədi oğlu həm də yüksək əxlaqı, təvazökarlığı və insanlara olan hörməti ilə seçilib. Onunla ünsiyyətdə olan hər kəs səmimiyyətini, müdrikliyini və daxili nurunu hiss edərdi. O, nəsillərə örnək ola biləcək bir həyat yolu keçmiş, həm peşəsi, həm də şəxsiyyəti ilə cəmiyyətə dəyər qatmışdır. Onun 80 illik yubileyini yad edərkən, əslində bir ömrün xatirəsini deyil, bir məktəbi, bir mənəvi irsi xatırlayırıq. Onun həyatı insanlara xidmətin, yaxşılığın və mənəvi zənginliyin ən gözəl nümunələrindən biri kimi yadda qalır.
Belə şəxsiyyətlər fiziki olaraq aramızda olmasalar da, əməlləri və xatirələri ilə daim yaşayırlar. Ruhu şad, xatirəsi əziz və unudulmaz olsun. Onun ömür yolu gələcək nəsillərə daim xeyirxahlıq, mərhəmət və insan sevgisi aşılayan bir nur kimi qalacaq.
Allah rəhmət eləsin!
