Cəfər Cabbarlı adına Respublika Gənclər Kitabxanasında “9 May Faşizm üzərində Qələbə Günü” ilə əlaqədar silsilə tədbirlər həyata keçirilir.
Avropa.info xəbər verir ki, bu gün – mayın 9-da faşizm üzərində qələbənin 80 ili tamam olur. Azərbaycan xalqının 600 mindən çox vətəndaşının bu şanlı qələbədə payı vardır. 130-dan çox Azərbaycan vətəndaşı həmin müharibə zamanı göstərdikləri igidliyə görə Sovet İttifaqı Qəhrəmanı adına layiq görülüb, 170 mindən çox əsgər və zabitimiz isə müxtəlif orden və medallarla təltif edilib.
Cəfər Cabbarlı adına Respublika Gənclər Kitabxananasında 9 May Faşizm üzərində Qələbə Günü ilə əlaqədar olaraq ənənəvi kitab sərgisi və xülasə (daycest) hazırlanıb. Daycestin hazırlanmasında əsas məqsəd geniş istifadəçi kütləsini Qələbə haqqında dərc olunmuş materiallarla tanış etməkdən ibarətdir.
“9 may – Faşizm üzərində Qələbə Günü” adlı daycestdə İkinci Dünya Müharibəsi haqqında geniş məlumat, Ümummilli lider Heydər Əliyev və cənab Prezident İlham Əliyevin Böyük Vətən Müharibəsi mövzusunda söylədikləri dəyərli fikirlər, bir sıra rəsmi sənədlərin tam mətni yer alır. Xülasədə qələbə haqqında 2015-2024-cü illərdə dövri mətbuat səhifələrində dərc edilmiş 20-dən çox məqalə araşdırılaraq və seçmə yolu ilə istifadəçilərin diqqətinə çatdırılır. Daycestdə məqalələr illər üzrə, daxildə isə əlifba ardıcıllığı ilə verilmişdir. “9 may – Faşizm üzərində Qələbə Günü” adlı daycest kitabxananın rəsmi saytında https://ryl.az/funds/daycest yerləşdirilib.
Kitabxanada təşkil edilən ənənəvi kitab sərgisində qələbə mövzusunda Azərbaycan və rus dillərində çap edilən 50-ə yaxın kitab, dövri mətbuat materialları və kitabxana əməkdaşları tərəfindən hazırlanmış “9 May Faşizm üzərində Qələbə Günüdür!” adlı daycest sərgilənməkdədir.
