“Minalar Əleyhinə Azərbaycan Kampaniyası” İctimai Birliyi işğaldan azad edilmiş ərazilərə qayıdan əhali arasında mina və partlamamış hərbi sursat (PHS) təhlükəsinə dair maarifləndirmə tədbirlərini davam etdirir.
Birliyin sədri Hafiz Səfixanov Avropa.info-ya açıqlamasında bildirib ki, növbəti maarifləndirmə tədbiri Xocavənd rayonunun Qırmızı Bazar qəsəbə tam orta ümumtəhsil məktəbində keçirilib.
Onun sözlərinə görə, tədbirdə Xocavənd rayonunda Bərpa, Tikinti və İdarəetmə Xidmətinin əməkdaşları, yerli sakinlər, müəllimlər və şagirdlər iştirak ediblər.
Hafiz Səfixanov qeyd edib ki, tədbir zamanı iştirakçılara layihənin məqsədləri, donorları, Azərbaycanda mina təmizləmə əməliyyatları və mina qurbanları barədə məlumat verilib. Təlimçilər tərəfindən isə ərazilərdə ən çox rast gəlinən mina və PHS növləri, təhlükəli əşyalarla qarşılaşarkən davranış qaydaları, partlayış risklərinin qarşısının alınması və təhlükəsizlik tədbirləri izah olunub.
O vurğulayıb ki, işğaldan azad edilmiş ərazilərə Böyük Qayıdış çərçivəsində geri dönən insanların mina təhlükəsi barədə məlumatlandırılması xüsusi əhəmiyyət daşıyır. Çünki keçmiş məcburi köçkünlərin böyük hissəsi uzun illər ərzində ölkənin müxtəlif bölgələrində yaşayıb və bu müddətdə mina və partlamamış hərbi sursat təhlükəsi ilə birbaşa qarşılaşmayıb.
Hafiz Səfixanov bildirib ki, əsas məqsəd geri qayıdan sakinlərdə, eləcə də azad edilmiş ərazilərdə çalışan və təhsil alan şəxslərdə təhlükəsiz davranış vərdişləri formalaşdırmaq, təhlükəli əşya aşkarlandıqda hansı dövlət qurumlarına və hansı qaydada müraciət edilməli olduğunu izah etməkdir.
Tədbirin sonunda iştirakçılara layihə çərçivəsində hazırlanmış maarifləndirici bukletlər təqdim olunub.
Birlik sədrinin sözlərinə görə, layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi ilə Qarabağ Dirçəliş Fondunun və Azərbaycan Respublikasının Minatəmizləmə Agentliyinin (ANAMA) tərəfdaşlığı ilə keçirilən qrant müsabiqəsi çərçivəsində həyata keçirilir.
Hafiz Səfixanov əlavə edib ki, layihə çərçivəsində Xocavənd, Cəbrayıl, Zəngilan, Laçın, Şuşa və Kəlbəcər rayonlarına daimi yaşamaq üçün qayıdan keçmiş məcburi köçkünlərin, həmçinin həmin ərazilərdə işləyən və təhsil alan şəxslərin partlayıcı sursatların yaratdığı təhlükələr barədə maarifləndirilməsi nəzərdə tutulur.
O bildirib ki, Xocavənd şəhərində və Xanoba kəndində də partlayıcı sursatların təhlükəsinə dair növbəti maarifləndirmə tədbirlərinin keçirilməsi planlaşdırılır.
