Avropa.info xəbər verir ki, Qəzzadakı Şifa xəstəxanasının direktoru Məhəmməd Əbu Silmiyye generatorları işə salmaq üçün gündə 1500-1700 litr yanacağa ehtiyac duyduqlarını,  əllərində olan yanacaq miqdarının isə  1000 litri keçmədiyini, bunun da bir neçə saata kifayət etdiyini bildirib.

Xəstəxana  direktoru Əbu Silmiyye  Ümumdünya Səhiyyə Təşkilatı (ÜST) ilə görüşdüklərini  və vəziyyətin xəstəxanaların tamamilə dağılmasına səbəb ola biləcək qədər ciddi olduğunu izah etdi.

Kritik saatlar

Xəstəxananın  dializ  bölməsinin elektrik enerjisini kəsmək məcburiyyətində qaldıqlarını vurğulayan Əbu Silmiyye, “Bu vəziyyət dializ seansları apara bilmədiyimiz üçün 350-dən çox xəstənin əziyyət çəkməsinə səbəb oldu” dedi.

Əbu Silmiyye yalnız “bir dəqiqə belə bağlana bilməyən” reanimasiya şöbəsini və gündəlik bombardmanlar səbəbindən çətinliklə fəaliyyət göstərən cərrahiyyə şöbəsini saxlaya bildiklərini söylədi.

Əbu Silmiyyə dedi:

“Bizi kritik dövr gözləyir. Əgər yaxın saatlarda yanacaq verilməsə, digər şöbələri bağlamaq məcburiyyətində qalacağıq. Bu,   reanimasiyada olan 13 xəstə, təcili əməliyyata ehtiyacı olan onlarla yaralı və ölüm təhlükəsi ilə üz-üzə qalan 17 körpə  üçün ölüm hökmüdür  . Əsl fəlakətlə üzləşəcək, xəstəxanalar insanları xilas etmək üçün yer olmaq əvəzinə, qəbiristanlığa çevriləcək.”

Dərman  çatışmazlığı

Əbu Silmiyye qeyd edib ki, işğalçı İsrailin Qəzza zolağında törətdiyi qətliamlar nəticəsində ölən və yaralananların sayının əhəmiyyətli dərəcədə artması səbəbindən   yaralılar üçün lazım olan dərman, tibbi ləvazimat və qan vahidləri baxımından ciddi çatışmazlıq yaranıb.

Heç bir səhiyyə sisteminin bu qədər böyük rəqəmin öhdəsindən gəlmək imkanının olmadığını bildirən Əbu Silmiyye, Qəzza zolağındakı xəstəxanaların, xüsusilə də Şifa xəstəxanasının dağıntı səbəbiylə tutumlarının cəmi 25 faizində fəaliyyət göstərdiyinə diqqət çəkdi.

Qan çatışmazlığı böhranı

Yaralıların sayının artması ilə qan böhranının da böyüdüyünü ifadə edən Əbu Silmiyye, “Keçən ay 10 min vahid qana ehtiyacımız var idi. Bu, görünməmiş bir rəqəmdir və görünməmiş xəsarətlərin miqyasını ortaya qoyur” dedi.

Qəzza sakinlərinin aclıq və pis qidalanma səbəbiylə qan azlığından əziyyət çəkdiyini bildirən Əbu Silmiyye, “Qəzzədə hər 10 adamdan 9-u qida çatışmazlığından əziyyət çəkir və qan verə bilmir. Hər 10 adamdan yalnız 1-dən qan ala bilirik” dedi.

Əbu Silmiyyə müharibəni “təcili humanitar zərurət” kimi xarakterizə edərək, müharibəni dayandırmağa çağırıb.

Əbu Silmiyye həmçinin avadanlıq və dərmanların daxil olması üçün sərhəd qapılarının açılmasını istəyib.