“Səfəvilər imperiyası Azərbaycan dövlətçilik tarixinin ən yüksək inkişaf mərhələsidir. Məhz Səfəvilər dövründə bütöv Azərbaycan idarəçiliyi formalaşdı və xalqımız tarixdə imperiya yaradan qüdrətli bir gücə çevrildi. Səfəviləri sırf məzhəb amilinə görə İrana bağlamaq Azərbaycan xalqının milli-mənəvi dəyərlərinə və dövlətçilik tarixinə qarşı hörmətsizlikdir. Çünki bu imperiyanın təməli qədim Azərbaycan şəhəri olan Ərdəbildə qoyulub və paytaxtı Təbrizdə təşəkkül tapıb”.
Avropa.info xəbər verir ki, bunu Sosdem.az-a Səfəvilər dövlətinə yönəlmiş saxta iddialara cavab verən Milli Cəbhə Partiyasının (MCP) başqan müavini, siyasi ekspert Məhəmməd Əsədullazadə deyib.
“Ermənistan Və İran Tariximizi Mənimsəməyə Çalışır”
Politoloq Azərbaycanın tarixi irsinə qarşı aparılan ideoloji hücumlara diqqət çəkib:
“Bu gün Ermənistan və İran Azərbaycanın zəngin dövlətçilik tarixinin olmadığını iddia etməyə çalışır. Ermənilər Qafqaz Albaniyasına, İran isə Səfəvilər irsinə yiyələnmək istəyir. Halbuki həm qədim Albaniya, həm də Səfəvilər imperiyası məhz Azərbaycan torpaqlarında bərqərar olub. Səfəvilərdən öncə mövcud olmuş Şirvanşahlar dövlətində hakimiyyətdə mənşəcə ərəb və fars sülalələri də təmsil olunub. İndi buna söykənib Şirvanşahları ərəb və ya fars dövləti elan etməliyik?! Səfəvilər imperiyasında isə idarəçilik və hakim sülalə müstəsna olaraq Azərbaycan türklərinə məxsus olub”.
“Səfəvilər Tariximizdir Və İrsimizə Sahib Çıxmalıyıq”
MCP rəsmisi dövlətin Şah İsmayıl Xətai irsinə verdiyi yüksək dəyəri və XXI əsr baxışını vurğulayıb:
“Şah İsmayıldan başlayaraq regionda zəngin elmi, hərbi və mədəni mühit formalaşdı. Təsadüfi deyil ki, Prezident İlham Əliyevin sərəncamı ilə Şah İsmayılın Bakıdakı abidəsi bərpa olundu, adına hərbi orden təsis edildi və paytaxtda inzibati rayon mövcuddur. Şübhəsiz ki, XXI əsr insanı orta əsrlərin təfəkkürü ilə düşünə bilməz. Biz Səfəvilərə məzhəb prizmasından deyil, qürur duyduğumuz şanlı tariximiz kimi yanaşırıq. Səfəvilər Azərbaycan dövlətçiliyinin təməl sütunudur və biz öz tariximizə sahib çıxmalıyıq”.
