Nyu-Yorkda Hudson çayında xam çirkab suları daşıyan qayıq partlayıb. Bir nəfərin öldüyü elan edilib.
Avropa.info-nun məlumatına görə ABŞ-ın Nyu-York şəhərində çirkab suları daşıyan qayıqda partlayış baş verib. Hudson çayında lövbər salmış qayıqda baş verən insident nəticəsində bir nəfərin öldüyü bildirilir. Şəhərin “Hunts Point” adlı qayığında baş verən partlayışda yaralanan digər işçinin xəstəxanaya aparıldığı açıqlanıb.
Hadisə dünən yerli vaxtla saat 10.30 radələrində Şimal çayının tullantı sularının təmizlənməsi sahəsinin yaxınlığında baş verib. Partlayış nəticəsində üçüncü işçinin yaralandığı, lakin müalicədən imtina etdiyi bildirilib.
Faktla bağlı araşdırmalara başlanılıb
Mövzu ilə bağlı açıqlama verən Nyu York Bələdiyyə Başçısı Erik Adams partlayışın səbəbinin müəyyən edilməsi üçün araşdırmaya başlanıldığını və hadisədə hər hansı cinayət niyyətinin olduğunun düşünülmədiyini bildirib.
ABŞ Sahil Mühafizəsi həmçinin bildirib ki, təmizlənmək üçün şəhərdən xam çirkab suları götürən qayıqda olan işçilər partlayış zamanı alov və qığılcımların yaranmasına səbəb olan işlə məşğul olublar.
Nyu York Polis Departamentinin məlumatına görə, ilk müdaxilə edənlər 59 yaşlı kişini suda huşsuz vəziyyətdə tapıblar. Kişinin hadisə yerində öldüyü müəyyən edilib. Bildirilib ki, mərhum uzun müddətdir ki, şəhərin ətraf mühitin mühafizəsi idarəsində işləyirmiş.
Bildirilib ki, partlayış nəticəsində kanalizasiya tullantıları qayığın göyərtəsinə yayılıb, yanğınsöndürənlər və ilkin tibbi yardım əməkdaşları tərəfindən təmizlik işləri aparılıb.
