Soyqırım İsrailin ifrat sağçı Milli Təhlükəsizlik Naziri İtamar Ben-Qvir, işğal altındakı İordan çayının qərb sahilində 4 fələstinli və 1 israillinin öldüyü hadisənin ardından Qəzza zolağında olduğu kimi İordan çayının qərb sahilinin də yerlə-yeksan edilməsini tələb edib.
Avropa.info xəbər verir ki, Ben-Qvir ABŞ mərkəzli X sosial media platformasındakı hesabından verdiyi açıqlamada, İsrailin hücumları nəticəsində viran qalan Qəzza zolağındakı Beyt Hanun kimi İordan çayının qərb sahilindəki Fələstinin şəhər və kəndlərinin dağıdılmasına çağırıb.
Təhlükəsizlik toplantısına qatılacağını bildirən Ben-Qvir, baş nazir Benyamin Netanyahu və İsrail ordusunun rəsmilərindən “bölgədəki fələstinlilərin evlərini havadan və D9 buldozerləri ilə dümdüz etməyi” istəyəcəyini bildirib.
“Bu, Yaxın Şərqdə danışılan dildir və biz Qəzzada bu barədə danışdığımız kimi, indi İordan çayının qərb sahilində də danışmağın vaxtıdır” dedi Ben-Qvir. O, verdiyi açıqlamalarla Qəzzada törətdikləri dağıntıların İordan çayının qərb sahilində də təkrarlanmasını istəyib.
İsrail kabinetinin digər ifrat sağçı üzvü, maliyyə naziri Bezalel Smotriç qəsb edilmiş Fələstin torpaqlarında qeyri-qanuni yaşayış məskənlərinin İsrailin “qoruyucu divarı” olduğunu iddia edərək, İsrail ordusunu fələstinlilərə qarşı sərt hücumlar həyata keçirməyə çağırıb.
İsrailin baş naziri Netanyahu işğal altındakı İordan çayının qərb sahilinin şimalında Fələstin torpaqlarını qəsb edən israillilərin başlatdığı, 4 fələstinli və 1 israillinin ölümü ilə nəticələnən hadisə ilə bağlı təhlükəsizlik toplantısı keçirməyə qərar verib.
İsrail baş nazirliyindən verilən açıqlamada Netanyahunun qısa müddət ərzində İsrail təhlükəsizlik və siyasi rəsmiləri ilə görüş keçirəcəyi bildirilib.
Açıqlamada İordan çayının qərb sahilinin şimalındakı “Havat Gilad” adlı qeyri-qanuni yaşayış məntəqəsi yaxınlığında baş verən hadisəyə “cavab veriləcəyi” bildirilib.
İşğal altındakı İordan çayının qərb sahilinin şimalında Tel qəsəbəsi yaxınlığında Fələstin torpaqlarını qəsb edən İsrail qüvvələri ilə İsraillilərin açdığı atəş nəticəsində 4 fələstinli həyatını itirib, 3-ü ağır olmaqla 4 fələstinli yaralanıb.
İsrailin fövqəladə yardım xidməti Davudun Qırmızı Ulduzundan verilən açıqlamada hadisədə yaralanan 4 israillidən birinin öldüyü, digər ikisinin vəziyyətinin ağır olduğu bildirilib.
İsrailin Qəzza zolağına hücumuna başladığı 2023-cü ilin oktyabrından bəri işğal altındakı İordan çayının qərb sahilində və Şərqi Qüdsdə fələstinlilərə qarşı həbslər, basqınlar və hücumlarda artım müşahidə olunur.
Bu müddət ərzində işğal altındakı İordan çayının qərb sahilində Fələstin torpaqlarını qəsb edən israillilərlə əməkdaşlıq çərçivəsində İsrail ordusunun artırdığı gərginlik 1182 fələstinlinin ölümünə, 13 minə yaxın insanın yaralanmasına, 24 minə yaxın insanın həbsinə, 33 min nəfərin məcburi köçkün olmasına səbəb olub.
