“Uşaqpulu məsələsində mövqeyim qətidir və dəyişməzdir. Bu vəsait həm humanist addım, həm də dövlətin öz gələcəyinə yatırdığı strateji investisiyadır. Mediada fikirlərimin kontekstdən çıxarılaraq təhrif edilməsi məni hədəfə çevirir. Mən heç vaxt deməmişəm ki, “uşaqpulu verilməsi düzgün deyil”.
Avropa.info xəbər verir ki, bunu illərdir parlament kürsüsündən uşaqpulunun bərpasını qətiyyətlə tələb edən, lakin son dövrlər mətbuatın manipulyasiyası ucbatından qınağa məruz qalan Milli Cəbhə Partiyasının (MCP) başqanı, deputat Razi Nurullayev deyib.
“Media Məni Hədəf Edir“
Millət vəkili parlament fəaliyyətində ən çox önəm verdiyi uşaqpulu məsələsinin necə manipulyasiya edildiyini kədərlə qeyd edib:
“Mən uşaqpulu məsələsinə həmişə çox ciddi yanaşmışam. Parlamentdə dəfələrlə bu barədə danışmışam. 2020-ci ildə deputat seçiləndə seçicilərə söz vermişdim ki, bu məsələni daima gündəmdə saxlayacam və dediyimi də etdim. Lakin bu məsələni gündəmdə saxlamaq və bununla bağlı danışmaq heç də asan deyil. Problem bilirsiniz nədədir? Media yazdığı məqalənin və ya aldığı müsahibənin daha yaxşı oxunması və klik qazanması üçün içərisindən elə bir cümləni sərlövhəyə çıxarır ki, uşaqpulunun lehinə ən çox mübarizə aparan adamı da cəmiyyətin qarşısında hədəfə çevirir. Artıq üçüncü dəfədir belə xoşagəlməz bir halla rastlaşıram.
Bir dəfə yazmışdılar ki, guya mən demişəm ki, ‘Qarabağda tikinti aparılır, minalar təmizlənir, ona görə də uşaqpulu verilməsi düzgün deyil’. Anlamırlar ki, o söz mənə aid deyil. Hökumət Milli Məclisdə hesabat verən zaman deputatlara deyib ki, Qarabağda quruculuq işləri aparıldığı üçün uşaqpulu məsələsini gündəmə gətirmək indiki mərhələdə düzgün deyil. Media isə bu fikri sərlövhəyə elə çıxarır ki, sanki bu mənim öz şəxsi və qəti mövqeyimdir. Bu cür yanaşma tamamilə qərəzlidir”.
“İnsanın İşi Yoxdursa, Ona 500 Manat Da Kifayət Etməyəcək”
MCP lideri cəmiyyətin bəzi kəsimlərində yaranan incikliyə və vəzifəli şəxslərdən gözləntilərin reallığına da toxunub:
“Digər bir məsələdə də bənzər hal baş verdi. Belə bir fikri başlığa qoymuşdular: ‘İnsanlara 500 manat uşaqpulu verilsə, 1000 manat istəyəcəklər’. Amma bu, mənim geniş təhlilimin ən sonda dediyim, kontekstdən qopardılmış bir hissəsi idi. Ondan əvvəl mən vurğulamışdım ki, insanları uşaqpulu istəməyə vadar edən ehtiyac içində olmaq, dolana bilməməkdir. Uşaqpulu isə yalnız dövlətin verdiyi kiçik bir sosial yardım olacaq. Bu yardımla heç bir ailə normal dolana bilməyəcək. Buna görə də ölkədə insanlara rəqabətli iş yerləri yaratmaq lazımdır ki, yüksək maaş alıb, yaxşı yaşaya bilsinlər. Əgər insanın daimi işi yoxdursa, ona 500 manat da kifayət etməyəcək. Mən məsələni bu cür əsaslandırmağa çalışmışam”.
“Sanki bizim əlimizdə xüsusi bir hökumət möhürü var”
Deputat cəmiyyətdən incikliyiini də dilə gətirib:
“Bu yanlış təqdimatlardan sonra bir az da cəmiyyətdən incidim. İnsanlar yaxşı bilir ki, bugünə qədər Razi Nurullayev uşaqpulu ilə bağlı mövqeyini zərrə qədər də dəyişməyən biridir. Həmişə bu məsələni cəsarətlə gündəmə gətirmişəm. Təəssüf ki, indi cəmiyyətdə bir uçurum yaranıb. Yaxşı da desən, pis də desən insanlar qəbul etmirlər, mütləq içərisindən mənfi nə isə axtarırlar. Bir də təəssüflər olsun ki, vəzifəli şəxslərdən, deputatdan elə tələblər irəli sürürlər ki, sanki bizim əlimizdə xüsusi bir hökumət möhürü var. Sanki möhürü basıb, imza çəkəndə hər şey bir anın içində həll olunacaq. Biz qanunvericiyik, təklif veririk, lakin icraedici mexanizm tamamilə fərqlidir”.
