May ayının 24-də 28 May Müstəqillik Gününə həsr olunmuş, layihə rəhbəri Aygün Əzizovanın olduğu “Hindistan və Azərbaycan arasında mədəni körpülər” adlı sərgi Maaya restoranında EVENTO Şirkətlər Qrupunun və Beynəlxalq Qalereyanın birgə təşkilatçılığı ilə təşkil olunub.
Avropa.info xəbər verir ki, sərgidə ümumilikdə 200 rəssam, media nümayəndələri və fəxri qonaqlar iştirak ediblər.
Tədbirdə fəxri qonaq qismində Milli Məclisin deputatı Razi Nurullayev, qızı Nuray Nurullayeva, Hindistanın Azərbaycandakı fövqəladə və səlahiyyətli səfiri Abhay Kumar və səfirliyin digər əməkdaşları iştirak ediblər.
Açılış mərasimində Azərbaycan və Hindistanın dövlət himnləri səsləndirilib.
Sərgini giriş sözü ilə açan Beynəlxalq Qalereyanın direktoru Elnurə İsgəndərova qeyd edib ki, bu möhtəşəm tədbir iki ölkənin zəngin mədəniyyətini, incəsənətini və ortaq dəyərlərini dünyaya tanıtmaq məqsədi daşıyır.
O bildirib ki, Azərbaycan və Hindistan qədim sivilizasiyaların beşiyi olmuş, zəngin irsə sahib ölkələrdir. Musiqidə, rəqsdə, ədəbiyyatda və memarlıqda mövcud olan ortaq məqamlar bu gün də xalqları bir-birinə yaxınlaşdırır. Azərbaycanın muğamı ilə Hindistanın raga musiqisi, xalçaçılıq sənəti ilə Hindistanın ipək və toxuculuq ənənələri, eləcə də poeziyada yer alan dərin fəlsəfi düşüncələr hər iki mədəniyyətin bir-birini tamamladığını nümayiş etdirir. Onun sözlərinə görə, bu sərgi də məhz həmin ortaq dəyərlərin bir körpü kimi xalqları birləşdirdiyini bir daha sübut edib.
Hindistanın Azərbaycandakı fövqəladə və səlahiyyətli səfiri Abhay Kumar çıxışında vurğulayıb ki, iki xalq arasında minilliklər boyu davam edən əlaqələr tarixi Atəşgah məbədində, eləcə də Azərbaycanda hind filmlərinə, musiqisinə, mətbəxinə və yoqaya artan maraqda öz əksini tapır. Səfir qeyd edib ki, bu zəngin mədəni və mənəvi mübadilələr Azərbaycan–Hindistan münasibətlərini daha da möhkəmləndirir.
Milli Məclisin deputatı Razi Nurullayev çıxışında sərginin iki ölkə arasında münasibətlərə gözəl töhfə olduğunu bildirib. O qeyd edib ki, bu sərgi yalnız sənət əsərlərinin nümayişi deyil, həm də iki qədim və zəngin mədəniyyətin bir-birinə hörmətinin, dostluğunun və qarşılıqlı anlaşmasının təntənəsidir.
EVENTA Şirkətinin rəhbəri Surjana Çhandra isə bildirib ki, bu gün burada Azərbaycan və Hindistan arasında mədəniyyət körpüsünü bir daha möhkəmləndirmək üçün toplaşıblar. Onun sözlərinə görə, sərgi sadəcə sənət əsərlərinin nümayişi deyil, həm də iki qədim sivilizasiyanın ruhunu bir araya gətirən bir bayramdır. Surjana Çhandra vurğulayıb ki, Azərbaycan və Hindistan arasında mədəni əlaqələr təkcə tarixi fakt deyil, həm də gələcəyə yönəlmiş bir ümid işığıdır.
Açılış mərasimindən sonra qonaqlar sərgidə nümayiş olunan əsrarəngiz sənət nümunələri ilə yaxından tanış olublar.
Tədbir çərçivəsində Azərbaycan və Hindistan musiqiləri səsləndirilib, milli rəqslər ifa olunub.
Hindistan mətbəxinin ləziz təamları da qonaqlara təqdim olunub və böyük maraqla qarşılanıb.
Sonda sərgi iştirakçılarına sertifikatlar təqdim olunub, xatirə fotoları çəkilib.
Aygün Oqtay,
Fotoların müəllifi: Camal
