-Azərbaycanla təmasların artması Ermənistanın xilasına cəhdləridir
-Tusk, Ştaynmayer məcburiyyətdən Türkiyə və Azərbaycanla münasibət qurur
Son zamanlar Azərbaycana dünyanın aparıcı dövlət rəsmilərinin səfəri, mütəmadi telefon zəngləri, eləcə də region dövlətlərinin səlahiyyətli nümayəndələrinin səfərləri, siyasi məsləhətləşmələrin keçirilməsi Azərbaycanın real hərbi və iqtisadi gücünə söykənən beynəlxalq nüfuzunun göstəricisi kimi, həm də regionun siyasi mənzərəsinin əsaslı dəyişdirilmə ehtimalının yüksək olması ilə bağlıdır.
Bunu Avropa.info-ya açıqlamasında Milli Cəphə Partiyasının başqan müavini, tanınmış hüquqşünas Vüqar Dadaşov deyib
Onun sözlərinə görə bir neçə gün əvvəl Fransa və Almaniyanın “Arte France” telekanalının “28 dəqiqə” verilişində Ermənistanın olmadığı Cənubi Qafqaz xəritəsi yayımlanması heç də təsadüfi və texniki səhv deyildi. Nəinki Almaniyada, bütün Avropada xüsusi siyasi nüfuza malik prezident Frank Valter Ştaynmayerin Azərbaycana səfəri də gedən qlobal dünya düzənində aparıcı xəttədə yerini möhkəmlətmək istəyidir. Bir müddət əvvəl Polşanın baş naziri Donald Tüskun Türkiyə prezidenti Ərdoğandan Avropa və Ukraynanın təhlükəsizliyini öhdəsinə götürməyi istəyinin reallaşma ehtimalı çox yüksəkdir. Təbii ki, Tusk təkcə öz adından xahiş etməmişdi.
Türkiyə Azərbaycan birliyi isə nəinki Avropanın hərbi baxımdan, eləcədə enerji təhlükəsizliyini həm öz təbii ehtiyatları, həmçinin Şərqdən və Xəzəryanı regiondan enerji daşıyıcılarının tranzit imkanları səbəbindən Türkiyə və Azərbaycanla təmasların artması müşahidə edilir. Yeri gəlmişkən, Donald Tuskun Türkiyə səfərindən və həmin o təhlükəsizlik xahişindən sonra Türkiyədə Ərdoğan hakimiyyətinə qarşı mitinqlərin başladılması həm də Türkiyənin Avropada tarixi nüfuzunun bərpasının qarşısını almaqdır.
Azərbaycana rəsmi səfərlərin, təmasların artması eyni zamanda Ermənistan Azərbaycan münasibəti və xüsusən mümkün sülh müqaviləsi ilə bağlı olsa da, faktiki olaraq Ermənistanı qorumaq cəhdidir. Azərbaycan heç bir halda Sovet dövründə Ermənistana qanunsuz verilmiş torpaqlar üzərində tam legitimlik qazandıran sülh müqaviləsi imzalanmayacaq. Ermənistan mütləq Azərbaycanın irəli sürdüyü şərtləri (Minsk qrupunun ləğvi, Ermənistan Konstitusiyasının ərazi iddiaları ilə bağlı müddəalarının dəyişdirilməsi tələbi) yerinə yetirməlidir. Əks halda və ən yaxşı nəticədə Azərbaycan Ermənistanı 1920-ci il Paris sülh konfransında tanındığı ərazilər daxilinə sıxışdıra bilər. Ehtimal edilən Ermənistan Azərbaycan arasında sülh müqaviləsi ilə əlaqədar Azərbaycanla xaricdən təmaslarınn intensivləşməsi əlbəttə ki, Ermənistanın mövcudluğunu qorumaq məqsədi daşıyır.
Donald Trampın ABŞ – ın yenidən prezident seçilməsindən sonra yeritdiyi siyasət nəticəsində faktiki olaraq Avropa birliyində fikir ayrılığı dərinləşib və Almaniya başda olmaqla bəzi ölkələr müstəqil şəkildə özlərinin təhlükəsizliyini təmin etmək niyyətindədir. Bir sıra Avropa ölkələrindən Macarıstan, Serbiya, Slovakiya, Sloveniya, Monteneqro və sair bəzi ölkələr Rusiya ilə əlaqələrini möhkəmlətmək istəyini gizlətmir. Ancaq, Avropada bir müddət əvvəl qeyd etdiyim kimi, müstəqil şəkildə nəinki özünün təhlükəsizliyini, bütün Avropanın təhlükəsizliyini təmin edə biləcək yeganə ölkə məhz Almaniyadır. Fransa artıq öz hərbi gücünü itirib və insan resursları da bu imkanı Fransaya vermir. Hətta, sülh dövründə belə Fransa ordusundan 2000-nə yaxın fərarilik halları qeydə alınıb. Almaniya isə mütləq özünün əzəmətli tarixini təkrarlamaq üçün üçüncü cəhdini edə bilər. Almaniyada əhalinin əhəmiyyətli hissəsinin türk mənşəçi olması və almanların türk etnosuna tarixi isti münasibəti Almaniyanı bütün Avropanın sahibinə çevirə bilər.
Dünya nəhəngi Çin ilə təhlükəsizlik mövzusunda məsləhətləşmələr, koordinasiyalı fəaliyyətin qurulması ətrafında müzakirələr heç şübhəsiz ki, Azərbaycanın yeni dünya düzənində strateji maraqlarının təmini üçün olduqca vacib faktordur. Azərbaycan – Türkiyə, Türkiyə – Böyük Britaniya eləcədə Azərbaycan – İsrail maraqları Çin – Azərbaycan münasibətlərində kənarda qalmır.
Avropa.info
