ABŞ-ın İsraildəki səfiri Mike Huckabee Britaniya, Fransa və Kanada da daxil olmaqla 25 ölkənin İsraili Qəzza zolağında “dərhal, qeyd-şərtsiz atəşkəs” tətbiq etməyə çağıran birgə bəyanatını “iyrənc” adlandırıb.
Avropa.info xəbər verir ki, Səfir Huckabee X hesabında İsrailin hücumu altında olan Qəzzada “damcı-damcı yardımı və mülki şəxslərin qeyri-insani öldürülməsini” pisləyən birgə bəyanatla bağlı açıqlama verib.
“Qəzza zolağındakı dəhşətli qarşıdurmaya dərhal, qeyd-şərtsiz və daimi atəşkəs yolu ilə son qoymaq üçün ümumi səydə birliyə” çağıran bəyanatı “iyrənc” adlandıran Huckabee, İngiltərə, Fransa və Kanada da daxil olmaqla 25 ölkənin HƏMAS yerinə İsrailə təzyiq etdiyini iddia etdi.
HƏMAS-ın hər atəşkəs təklifini rədd etdiyini iddia edən Hukabi, “İsraili günahlandırmaq ağılsızlıqdır” dedi.
25 ölkə İsrailin Qəzzada yardım istəyən fələstinliləri öldürməsini pisləyir
İsrailin 21 aydır Qəzza zolağında həyata keçirdiyi qırğınlara və humanitar yardımlara tətbiq etdiyi embarqo nəticəsində baş verən aclıqdan ölənlərə beynəlxalq ictimaiyyətin reaksiyası getdikcə artır.
Böyük Britaniya, Fransa, Kanada və Aİ-nin Bərabərlik, Hazırlıq və Böhranların İdarə Edilməsi üzrə komissarı Hadja Lahbib də daxil olmaqla 26 beynəlxalq tərəfdaş, işğal olunmuş Fələstin torpaqları ilə bağlı yazılı bəyanat yayıb.
İsraili humanitar yardımla bağlı beynəlxalq öhdəliklərini yerinə yetirməyə çağıran bəyanatda deyilir: “Yardımların damcı üsulu ilə çatdırılmasını və ən əsas ehtiyacları olan su və yemək istəyən mülki şəxslərin, o cümlədən uşaqların qeyri-insani şəkildə öldürülməsini pisləyirik. 800-dən çox fələstinlinin yardım axtararkən öldürülməsi dəhşətlidir”.
Bəyanatda Qəzza zolağında Fələstin əhalisinin “humanitar yardım şəhəri”nə köçürülməsi ilə bağlı təkliflərin “tamamilə qəbuledilməz” olduğu vurğulanıb və “dərhal, qeyd-şərtsiz və daimi atəşkəs yolu ilə Qəzza zolağında dəhşətli münaqişəyə son qoymaq üçün ümumi səydə birləşmək” çağırışı edilib.
