Cəfər Cabbarlı adına Respublika Gənclər Kitabxanasında akademik Zərifə xanım Əliyevanın anadan olmasının 102-ci ildönümü münasibətilə hazırlanan silsilə materiallar istifadəçilərə təqdim edilib.
Bu gün XX əsr Azərbaycan tarixinin görkəmli siması, Əməkdar elm xadimi, tibb elmləri doktoru, professor, Azərbaycan Elmlər Akademiyasının həqiqi üzvü Zərifə xanım Əliyevanın anadan olmasının 102-ci ildönümü tamam olur.
Avropa.info xəbər verir ki, Respublika Gənclər Kitabxanasında xalqımızın dəyərli ziyalısı Zərifə xanım Əliyevanın mənalı həyat yolundan və dəyərli elmi fəaliyyətindən bəhs edən biblioqrafik icmal və videomaterial hazırlanmışdır. Biblioqrafik icmalda bir sıra rəsmi sənədlərin “Azərbaycanda oftalmologiya elminin inkişafında və oftalmoloji xidmətin təşkilində akademik Zərifə Əliyevanın rolu” adlı məqalənin tam mətni təqdim edilir. Bundan əlavə materialda Zərifə xanımın həyat və fəaliyyəti, müəllifi olduğu Azərbaycan, ingilis və rus dillərində çap edilən əsərləri, onun haqqında yazılan kitablar və monoqrafiyalar öz əksini tapır. İcmalda 50-dən çox kitabın biblioqrafik təsviri, qısa annotasiyası, kitabın yerləşdirildiyi linklər təqdim edilir. Hazırlanan material kitabxananın rəsmi saytında https://www.ryl.az/funds/biblioqrafik-icmal yerləşdirilib.
Kitabxanada əməkdaşları tərəfindən hazırlanan videomaterialda akademik Zərifə xanım Əliyevanın elmi-pedaqoji və ictimai fəaliyyəti, Azərbaycanda oftalmologiya elminin inkişafına verdiyi dəyərli töhfələr, layiq görüldüyü mükafat və fəxri adlar haqqında geniş məlumat təqdim edilir. Videomaterialda Zərifə xanım Əliyevanın foto və video arxivindən görüntülər də sərgilənir.
“Akademik Zərifə xanım Əliyeva – 102” adlı material kitabxananın rəsmi saytında https://www.ryl.az/multimedia/zerife-eliyeva-102 yerləşdirilib.
