Azərbaycan Prezidentinin köməkçisi Hikmət Hacıyev işğaldan azad edilmiş Qarabağda müharibədən sonra başlanan yenidənqurma prosesinin böyük sürətlə davam etdiyini bildirib. O, hazırda bölgədə təxminən 60 min insanın yaşadığını açıqlayıb.
Avropa.info xəbər verir ki, bu barədə H.Hacıyev CNN TÜRK-ün Xüsusi Xəbərlər müdiri Fülya Öztürkə verdiyi özəl müsahibəsində deyib.
Prezidentin köməkçisi vurğulayıb ki, hazırda 9 şəhər və 300-dən çox yaşayış məntəqəsi sıfırdan yenidən inşa olunur, eyni zamanda ərazilərin minadan təmizlənməsi prosesi fasiləsiz sürətdə davam edir. Hacıyev Türkiyənin bu böyük bərpa prosesinə çox mühüm töhfələr verdiyini xüsusi qeyd edib.
Zəngəzur dəhlizinin açılmasının strateji əhəmiyyətinə toxunan H.Hacıyev bildirib ki, bu layihə gerçəkləşdikdən sonra İstanbuldan Bakıya qədər fasiləsiz avtomobil və dəmir yolu əlaqəsi mümkün olacaq. O, Azərbaycan-Türkiyə münasibətlərinin daha da güclənərək davam etdiyini diqqətə çatdırıb.
Müsahibədə qlobal və iqtisadi məsələlərə də toxunan Prezidentin köməkçisi Azərbaycanın Fələstin münaqişəsində iki dövlətli həll variantını dəstəklədiyini bəyan edib. Hacıyev həmçinin Türkiyəyə təxminən 20 milyard dollar sərmayə yatıran SOCAR-ın iki qardaş ölkə arasındakı iqtisadi əməkdaşlığın baş simvollarından birinə çevrildiyini vurğulayıb.
Avropa.info
