İsrail ilə İran arasında toqquşmalar davam edərkən, İsrail İranın iki mühüm şəhərinə hücum təşkil edib.
Avropa.info xəbər verir ki, İran mediası İsrailin cənub-qərbdə yerləşən Əhvaz və Mahşəhr şəhərlərində İnqilab Keşikçiləri Korpusuna (SEPAH) məxsus kazarma və qərargahları eyni vaxtda hədəf aldığını bildirib. İsrailin hücum etdiyi Əhvaz İranın əsas neft hasilatı bölgəsi olan Xuzistan vilayətinin mərkəzi şəhəridir.
İran mediasının məlumatına görə, İsrail qüvvələri eyni vaxtda Xuzistan vilayətinə bağlı Əhvaz şəhəri ilə Mahşəhr limanında yerləşən İran İnqilab Keşikçiləri Korpusuna məxsus kazarma və qərargahlara hücum edib. Hücumdan sonra hava hücumundan müdafiə sistemlərinin işə düşdüyü və ərazidən gur tüstülərin yüksəldiyi müşahidə olunub.
İraq sərhədinə yaxın olan Əhvaz İranın əsas neft hasilatı bölgəsi olan Xuzistan vilayətinin mərkəzidir.
İran mediası əlavə edib ki, İsrail qüvvələri səhər saatlarında İsfahandakı nüvə obyektini də hədəf alıblar. Xəbərlərə görə, həmin obyektə hücumdan sonra radiasiya sızması qeydə alınmayıb.
Digər tərəfdən, İranın hücumları da gün ərzində davam edib. İsrail mediası, ölkənin şimalında yerləşən Beyt Şean şəhərində bir binanın dron hücumu ilə vurulduğunu bildirib. Hadisədə ölən və ya yaralanan olmasa da, İranın “Şahed-136” tipli pilotsuz uçuş aparatının ilk dəfə olaraq İsrailin “Dəmir Qübbə” hava hücumundan müdafiə sistemini keçə bildiyi vurğulanıb.
Digər mühüm bir hadisəni isə İsrailin Müdafiə Naziri İsrael Kats açıqlayıb. Kats bildirib ki, İsrail ordusunun İranın Qum şəhərinə təşkil etdiyi hücum zamanı SEPAH-ın Qüds Qüvvələrinin Fələstin Birliyinin rəhbəri Səid İzadi öldürülüb. Bundan əlavə, İsrail dünən keçirdiyi hava hücumu zamanı İran İnqilab Keşikçiləri Ordusunun İkinci Pilotsuz Uçuş Aparatları Briqadasının komandiri Əmin Pur Cudakini də öldürdüyünü açıqlayıb.
Xatırladaq ki, İranda İsrailyönlü şəxslərə qarşı əməliyyatlar da davam edir. “Tesnim” xəbər agentliyinin məlumatına görə, Buşehr vilayətinin polis rəisi Heydər Suseni məsələ ilə bağlı açıqlama verib.
Suseni bildirib ki, aparılan izləmə və araşdırmalar nəticəsində, ictimaiyyəti təhrik etmək və xalqın psixoloji təhlükəsizliyini hədəfə almaq məqsədilə İsrailə dəstək verdikləri müəyyən edilən 9 nəfər saxlanılıb. İranlı rəsminin bildirdiyinə görə, həmin şəxslər artıq məhkəməyə təhvil verilib.
Digər tərəfdən, İranın Milli Təhlükəsizlik Ali Şurasının yazılı açıqlamasında bildirilib: “İsrail tərəfindən aldadılan və ya bilərəkdən sionist rejimlə hər hansı bir əlaqə quran şəxslər, 1 Tir (22 iyun) tarixinə qədər səlahiyyətli orqanlara müraciət etdikləri təqdirdə, İslam əfvi çərçivəsində cəzadan azad oluna bilərlər.”
Açıqlamada qeyd olunub ki, bu tarixə qədər təslim olmayan şəxslər hərbi vəziyyətdə düşmənlə əməkdaşlıq edən “beşinci kolon” kimi qiymətləndiriləcək və bu şəxslər casusluq və ya hərbi əməkdaşlıq ittihamları ilə ən ağır cəzalarla üzləşəcəklər.
Xüsusilə pilotsuz uçuş aparatları (PUA), rabitə cihazları, silah və ya digər hərbi avadanlıqla yaxalanan şəxslərlə bağlı dərhal hüquqi tədbir görüləcəyi bildirilib.
İsrailin 13 iyun tarixində İrana qarşı başlatdığı hücumlarda yüksək rütbəli iranlı şəxslər hədəf alınmışdı. İsrailin hücumlarına İran da qarşı hücumlarla cavab verib.
İsrail xüsusilə İranın paytaxtı Tehran və nüvə obyektlərinin yerləşdiyi əraziləri hədəf aldığı halda, İran isə Təl-Əviv və Hayfa kimi strateji şəhərlərə hücumlar təşkil edib.
Qarşılıqlı toqquşmaların nəticələri isə hər keçən gün daha da ağırlaşır.
