İsrailə qarşı cavab zərbələrini davam etdirən İran, aldadılaraq ya da bilərəkdən Təl-Əvivlə əməkdaşlıq edən şəxslərə çağırış edib.
Avropa.info xəbər verir ki, Milli Təhlükəsizlik Yüksək Şurasının Baş Katibliyi bu barədə açıqlama yayıb. Açıqlamada deyilir: “İsrail tərəfindən aldadılmış, bilərəkdən və ya bilmədən sionist rejimlə hər hansı bir əlaqə qurmuş şəxslər, əgər iyunun 22-dək özlərini səlahiyyətli orqanlara təqdim etsələr, İslam əfvi çərçivəsində cəzadan azad edilə bilərlər”.
Açıqlamada qeyd olunur ki, bu tarixə qədər təslim olmayan şəxslər müharibə şəraitində düşmənlə əməkdaşlıq edən “beşinci kolon” kimi qiymətləndiriləcək və bu şəxslərə casusluq və ya hərbi əməkdaşlıq ittihamları ilə ən ağır cəzalar tətbiq olunacaq. Xüsusilə pilotsuz uçuş aparatları (PUA), rabitə cihazları, silahlar və ya digər hərbi avadanlıqlarla tutulan şəxslər barəsində dərhal tədbir görüləcəyi vurğulanıb.
İsrail agentlərinin “mini dron” və partlayıcı maddələr istehsal edib yığdıqları emalatxanalar İranın müxtəlif şəhərlərində aşkar olunub. Dövlət televiziyası həmin emalatxanalara edilən basqınların görüntülərini yayımlayıb. Tehran başda olmaqla bir sıra şəhərlərdə İsrail adına fəaliyyət göstərən çox sayda şəxsin saxlanıldığı bildirilir.
