Fransa parlamenti 15 yaşından kiçik uşaqların sosial mediadan istifadəsini qadağan edən qanun layihəsini qəbul edib.Fransa “sosial mediadan istifadəyə yaş tənzimləmələri tətbiq edən ilk Aİ ölkəsi” olub.
Avropa.info xəbər verir ki, Prezident Emmanuel Makron tərəfindən dəstəklənən 15 yaşından kiçik uşaqların sosial mediaya girişinin qarşısını alan qanun layihəsi Fransa Senatında qəbul edildikdən sonra Milli Məclisdə də səsə qoyulub.
Qanun layihəsinin səsə qoyulduğu sessiyada çıxış edən deputatlar bu tənzimləmənin fransız uşaqlarının müdafiəsi üçün zəruri olduğunu vurğulayıblar.
Aylarla davam edən danışıqlardan sonra son şəklini alan qanun layihəsi 279 deputatın dəstəyi, 81 deputatın əleyhinə olmaqla qəbul edilib. Beləliklə, Fransa “sosial mediadan istifadəyə yaş tənzimləmələri tətbiq edən ilk Avropa İttifaqı (Aİ) ölkəsi” oldu.
ABŞ-da yerləşən X şirkətinin sosial media platformasında verdiyi açıqlamada Makron “söz verdiyi kimi” 15 yaşdan kiçiklər üçün sosial medianın qadağan edildiyini açıqlayıb.
Qanun layihəsini dəstəkləyən parlamentarilərə təşəkkür edən Makron, uşaqların onlayn qorunması üçün qanunun həyata keçirilməsinin vacibliyini vurğulayıb.
Sentyabrın 1-dən etibarən sosial media hesablarının açılmasına icazə verilməyəcək.
Qanun layihəsinə əsasən, sosial media platformalarında yaş yoxlama sistemi quraşdırılmalı və 15 yaşından kiçik uşaqlara sentyabrın 1-dən etibarən sosial media hesabı açmağa icazə verilməyəcək.
Sosial media platformalarından 4 ay ərzində 15 yaşdan kiçik hesabların bağlanması tələb olunacaq.
Fransada 15 yaşdan kiçik insanların sosial mediadan istifadəsinin tənzimlənməsi ilə bağlı layihə mətni yanvarda Milli Məclis, apreldə isə Senat tərəfindən təsdiqlənsə də, qanun layihələri arasında fərqlər var idi. Dünən Milli Assambleya və Senat eyni layihə mətni üzərində razılığa gəliblər.
Yetkinlik yaşına çatmayanların sosial mediadan istifadəsi son vaxtlar ölkələrin gündəmində olsa da, dünyanın 20-yə yaxın ölkəsi uşaqların sosial mediaya çıxışı ilə bağlı tənzimləmələr hazırlayıb və ya edəcəklərini açıqlayıb.
Avstraliya, Çin, Braziliya, İndoneziya və Malayziya sosial mediadan istifadə üçün yaş məhdudiyyəti tətbiq edən ölkələr arasında olsa da, Aİ də bu istiqamətdə addımlar atacağına söz verib.
