Vətənə xidmət edən, canını riskə atan insanların taleyi çox zaman unudulur, dövlətin qorumağa borclu olduğu insanlar bəzən məmur laqeydliyinin, biganəliyinin qurbanına çevrilir. Elə keçmiş hərbçi Əliyev Məhərrəm Mühafiz oğlunun başına gələnlər də bunun acı nümunəsidir.
Bu barədə İlkxeber.org-a danışan Məhərrəm Əliyevin dediyinə görə hələ 1997-ci ildə Türkiyədə hərbi təhsil alarkən təlim zamanı ağır zədə alıb. Aldığı zədə nəticəsində onda epileptik tutmalar başlayıb. O, uzun müddət İstanbul GATA xəstəxanasında müalicə alıb. Daha sonra Azərbaycana qayıdaraq tank komandiri kimi xidmətini davam etdirib. Lakin xəstəliyin yenidən baş qaldırması səbəbindən tank komandirliyindən kənarlaşdırıb hərbi hissədə anbar müdiri vəzifəsinə təyin ediblər. Bir müddət sonra səhhətindəki problemlərlə bağlı xəstəliyinə görə ordudan tərxis olunub.
İllərlə dövlətə xidmət edən bu hərbçi 2008-ci ildən II qrup əlil kimi təqaüd alırdı. Amma 2021-ci ildən sonra qanunvericilikdə edilən dəyişikliklərlə onun təqaüdü kəsilib. Səbəb? Guya o, “sağalıb”. Halbuki həkimlərin rəyinə görə epilepsiya ömürlük xəstəlikdir və hər an yenidən baş qaldıra bilər.
Beləliklə, dövlət qurumları Məhərrəm Əliyevi “sağlam” sayıb təqaüdünü kəsib, amma eyni zamanda “xəstə” sayıb işləməsinə də icazə vermir. Bu absurd vəziyyət bir insanı həm işsiz, həm də çörəksiz qoyub.
Məhərrəm Əliyev deyir:
“Mənə deyirlər ki, sən xəstəsən, təqaüd düşmür. Deyirəm, yaxşı, onda işləməyə icazə verin. Onu da vermirlər. Mən nə etməliyəm? Təqaüd yoxdur, iş yoxdur. Beləcə, məni ailəmlə birlikdə çörəksiz qoyublar”.
Hazırda keçmiş hərbçi “VTEK”, TƏBİB və poliklinika arasında qalıb. Hər yer eyni cavabı verir: “Xüsusi şəraitdə işləyə bilər.” Amma ölkədə elə “xüsusi şəraitdə” iş yerləri hardadır? Bu qeydlə heç bir müəssisə onu işə götürmür.
Əslində, bir vətəndaş xəstədirsə, onun sosial təminatı dövlət tərəfindən qorunmalıdır. Əgər işləyə bilirsə, ona saxta bəhanələrlə qadağa qoyulmamalıdır.
Bu cür hallarda suallar yaranır: Əgər Məhərrəm Əliyev sağlamdırsa, niyə ona işləməyə icazə verilmir? Əgər xəstədirsə, niyə təqaüdü bərpa olunmur? Vətəndaşların sosial müdafiəsinə məsuliyyəy daşıyan qurumlar hara baxır. Onların biganəliyi səbəbindən bu gün bir keçmiş hərbçi bürokratik süründürməçiliyin qurbanına çevrilib.
Məhərrəm Əliyev çıxış yolunu yalnız mətbuatda görür. O, sonda deyir: “ Əmək və Əhalinin Sosial Müdafiəsi Nazirliyi, Müdafiə Nazirliyi, TƏBİB mənə qarşı bu cür biganə münasibətə son qoysun, sağlamlıq durumuma yenidən və obyektiv baxış keçirilsin, təqaüdüm bərpa olunsun və səhhətinə uyğun işləmək imkanı verilsin.
Mən artıq çıxış yolu tapa bilmirəm, sadəcə düşdüyüm vəziyyətlə bağlı ədalət istəyirəm. Bəlkə, səsimi mətbuat vasitəsilə eşidərlər”.
Bəli, çox acınacaqlıdır ki, bu gün vətənə xidmət edən keçmiş hərbçinin səsi məmur kabinetlərində eşidilmir. Vətənə sədaqətlə qulluq etməklə başlayan bir həyat hekayəsi məmur biganəliyi ucbatından faciəyə çevrilib. Amma bu cür insanları “arxivə atmaq” yox, qorumaq, yaşatmaq və haqqını bərpa etməkdir, əks halda “vətənə xidmət” anlayışı kağız üzərindəki ifadədən o tərəfə keçməyəcək.
Avropa.info yazıda adı çəkilən qurumların mövqeyini də dərc etməyə hazır olduğunu bildirir.
