Fevralın 5-nə keçən gecə Ukraynaya məxsus pilotsuz təyyarələr Krasnodar vilayətinə uçub. Qubernator Veniamin Kondratyev bildirib ki, hücum dəf edilib, lakin qalıqlar Novominskaya kəndində neft məhsulları anbarına düşüb.
Avropa.info xəbər verir ki, bu barədə “The Moscow Times” nəşri yazıb.
Mənbə qeyd edir ki, anbarda yanğın başlayıb. Yanğının söndürülməsinə 55 nəfər və 19 texnika cəlb olunub. İlkin məlumata görə, itki yoxdur.
Yerli sakinlər “Albaşneft” neft bazasının vurulduğunu deyiblər:
“Bu, Kanevski rayonunda yeganə neft emalı zavodudur. Onun əsas fəaliyyəti neft məhsulları, o cümlədən benzin, dizel yanacağı və mazut istehsal etməkdir. Neft emalı zavodunda tutumu 9-10,3 min kubmetr olan səkkiz çən var. Burada ildə 320 min tona qədər neft emal olunur”.
Ukrayna Milli Təhlükəsizlik və Müdafiə Şurası yanında Dezinformasiyaya Qarşı Mübarizə Mərkəzinin rəhbəri Andrey Kovalenko bəyan edib ki, “Albaşneft” “Rusiya ordusunun logistika obyekti”dir.
Neft emalı zavodu Ukrayna Silahlı Qüvvələrinin nəzarətində olan ərazidən 230 km aralıda yerləşir. Rusiya Müdafiə Nazirliyi yaydığı xəbərdə Krasnodar diyarına hücumun dəf edildiyi barədə məlumat verməyib.
Hesabatda Kursk və Belqorod vilayətlərində vurulan yalnız dörd pilotsuz təyyarədən bəhs edilir.
