“Trabzonspor”un yeni transferi, dünya şöhrətli misirli ulduz Məhəmməd Salahın ailəsi ilə birlikdə məskunlaşacağı lüks villanın təfərrüatları və müqaviləsinin maliyyə şərtləri bəlli olub.
Avropa.info xəbər verir ki, “Şenol Güneş” İdman Kompleksində təşkil olunan möhtəşəm mərasimdə təxminən 30 min azarkeşin önündə 2 illik rəsmi müqaviləyə imza atan 10 nömrəli hücumçu, ilk günlərini mehmanxananın “kral dairəsi”ndə keçirdikdən sonra yeni evinə köçməyə hazırlaşır.
975 kvadratmetrlik möhtəşəm malikanə
Türkiyə mətbuatının verdiyi məlumata görə, Salah və ailəsi Trabzonun Yalıncak ərazisində yerləşən xüsusi villanı bəyənib. Ümumi sahəsi 975 kvadratmetr olan villa bütün müasir imkanlarla təchiz olunub:
Giriş mərtəbəsi (120 kv.m): Geniş salon, mətbəx, qonaq otağı, hamam və 45 kvadratmetrlik mənzərəli eyvan.
Birinci mərtəbə (120 kv.m): 3 yataq otağı, 3 hamam, xüsusi ebeveyn süiti (paltar dəyişmə otağı və hamamı ilə) və camaşırxana.
Bağça mərtəbəsi (230 kv.m): Sauna, idman zalı, qapalı hovuz, qış bağı, iş otağı, əlavə salon və mətbəx, kiler və texniki otaqlar.
Mansard (35 kv.m): Xüsusi kinoteatr zalı və anbar sahəsi.
Həyətyanı sahə: 270 kv.m ön və 485 kv.m alt bağça, açıq xüsusi hovuz, tonqal zonası, bağça mətbəxi, hobbi bağı və uşaq oyun meydançası.
Bundan əlavə, malikanə tam “ağıllı ev” sistemi, mərkəzləşdirilmiş təhlükəsizlik kameraları, akustik səs sistemi və döşəmədən qızdırılma ilə təmin edilib.
Salahın qazanacağı astronomik məbləğ
Misirli ulduzun “Trabzonspor”dakı qazancı da diqqət çəkir. Əldə olunan razılaşmaya əsasən, futbolçuya hər mövsüm üçün 10 milyon avro illik maaş və 7 milyon avro imza haqqı olmaqla, ümumilikdə 17 milyon avro zəmanətli məbləğ ödəniləcək.
Müqavilədə nəticələrə bağlı xüsusi bonuslar da nəzərdə tutulub.
İmic hüquqları çərçivəsində “TS Club” mağazalarında “Muhammed Salah” brendi altında satılacaq məhsulların gəlirindən futbolçuya 20% pay veriləcək.
Menecerlik xidməti üçün isə ümumi məbləğin 5%-i həcmində ödəniş ediləcək.
