Biləsuvarda Qadınların Sosial İnkişafına Dəstək İctimai Birliyi tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən “Ekoloji təmiz dünya naminə icmaların maarifləndirilməsi və davamlılığının təşkili” layihəsi çərçivəsində növbəti maarifləndirici icma görüşü Biləsuvar rayonunun Dərvişli kəndində təşkil olunub.
Avropa.info xəbər verir ki, layihənin əsas məqsədi əhalinin ekoloji bilik və bacarıqlarının artırılması, ətraf mühitin mühafizəsi sahəsində ictimai məsuliyyət hissinin gücləndirilməsi, ekoloji problemlərin həllində yerli icmaların fəal iştirakının təşviqi və davamlı ekoloji davranış vərdişlərinin formalaşdırılmasına dəstək verməkdir. Bu məqsədlə layihə çərçivəsində Biləsuvar rayonunun müxtəlif yaşayış məntəqələrində silsilə maarifləndirici tədbirlərin keçirilməsi nəzərdə tutulub.
Dərvişli kəndində baş tutan görüşdə kənd sakinləri, qadınlar, gənclər, ağsaqqallar, yerli fəallar və digər icma üzvləri iştirak ediblər. Tədbirdə layihənin məqsəd və vəzifələri barədə ətraflı məlumat verilib, ekoloji təhlükəsizliyin təmin edilməsində vətəndaşların üzərinə düşən məsuliyyət, ətraf mühitin qorunmasının cəmiyyətin sağlam inkişafındakı rolu, təbii sərvətlərdən səmərəli istifadə, tullantıların düzgün idarə olunması, məişət tullantılarının çeşidlənməsi, plastik tullantıların azaldılması, yaşıllıqların mühafizəsi, ağacəkmə təşəbbüslərinin əhəmiyyəti, su ehtiyatlarından qənaətlə istifadə və iqlim dəyişikliklərinin təsirləri barədə geniş fıkırlir qeyd olunub.
Çıxış edənlər qeyd ediblər ki, ekoloji problemlərin həlli yalnız dövlət qurumlarının fəaliyyəti ilə məhdudlaşmır. Bu istiqamətdə hər bir vətəndaşın, xüsusilə də yerli icmaların fəal iştirakı, ekoloji məsuliyyətli davranışı və maariflənməsi mühüm əhəmiyyət daşıyır. Məhz bu baxımdan layihə çərçivəsində keçirilən görüşlər insanların ekoloji mövzularda məlumatlılığının artırılmasına, ətraf mühitə həssas münasibətin formalaşdırılmasına və ekoloji təşəbbüslərin genişlənməsinə töhfə verir.
Tədbir zamanı iştirakçılar ekoloji problemlərlə bağlı fikir və təkliflərini səsləndirib, yaşadıqları ərazidə müşahidə olunan ekoloji məsələlər ətrafında müzakirələr aparılıb. Kənd sakinlərini maraqlandıran suallar cavablandırılıb, ətraf mühitin qorunmasına dair praktiki tövsiyələr təqdim olunub. Görüş interaktiv müzakirələr şəraitində keçərək iştirakçıların mövzuya böyük maraq göstərdiyini nümayiş etdirib.
Layihə rəhbərliyi bildirib ki, ətraf mühitin mühafizəsi və ekoloji təhlükəsizliyin təmin olunması istiqamətində maarifləndirmə tədbirlərinin keçirilməsi cəmiyyətin ekoloji mədəniyyətinin yüksəldilməsinə xidmət edir. Xüsusilə kənd icmalarında ekoloji biliklərin artırılması gələcək nəsillər üçün sağlam və təhlükəsiz mühitin formalaşdırılmasına mühüm rol oynayır.
Qeyd olunub ki, layihə çərçivəsində növbəti mərhələlərdə də Biləsuvar rayonunun digər yaşayış məntəqələrində maarifləndirici görüşlər, ictimai müzakirələr və ekoloji təşəbbüslərin təşviqinə yönəlmiş tədbirlər davam etdiriləcək. Layihənin əsas hədəflərindən biri yerli əhali arasında ekoloji məsuliyyətin gücləndirilməsi, davamlı inkişaf prinsiplərinin təbliği və ekoloji baxımdan sağlam həyat tərzinin təşviq edilməsidir.
Biləsuvarda Qadınların Sosial İnkişafına Dəstək İctimai Birliyi bundan sonra da dövlət-vətəndaş cəmiyyəti əməkdaşlığı çərçivəsində ətraf mühitin qorunmasına, ekoloji maarifləndirməyə və davamlı inkişaf məqsədlərinə xidmət edən layihələrin həyata keçirilməsini davam etdirəcək.
