“Milli Məclisdə birinci oxunuşda müzakirə edilən layihə Azərbaycanda kiçik bizneslərin bank krediti almadan maliyyə cəlb edə bilməsi üçün hüquqi baza formalaşdırır; İnvestorlar üçün risklər mövcud olsa da, platformalar Mərkəzi Bankın birbaşa nəzarəti və reyestrində fəaliyyət göstərəcək”.
Avropa.info xəbər verir ki, bu barədə ölkədə innovativ biznes mühitinin inkişafını, startapların maliyyəyə çıxış imkanlarını və yeni qanun layihəsinin gətirdiyi şəffaflıq mexanizmlərini Sosdem.az-a şərh edərkən millət vəkili, deputat Razi Nurullayev danışıb.
“İnsanın Kiçik Məbləğlərlə Layihələrə Yatırım Etməsinə Yol Açır”
Millət vəkili kraudfandinq mexanizminin mahiyyətini və gənc sahibkarlar üçün yaratdığı yeni imkanları sadə dildə izah edib:
“Təsəvvür edin ki, çox yaxşı biznes və ya startap ideyanız var. Amma onu həyata keçirmək üçün 100 min manat lazımdır. Bankdan kredit almaq çətindir, böyük investor tapmaq isə mümkün olmur. Yeni qanun sizə başqa yol açır. Artıq xüsusi internet platformaları vasitəsilə yüzlərlə, hətta minlərlə insan layihənizə kiçik məbləğlərlə yatırım edə biləcək. Məsələn, 500 nəfər hərəsi 200 manat yatırarsa, siz lazım olan 100 min manatı toplaya bilərsiniz.
Bunun qarşılığında investorun nə qazanacağı isə birbaşa layihənin növündən asılıdır. İnvestor şirkətdə pay (səhm) əldə edə bilər və ya borc əsaslı maliyyələşdirmədə müəyyən müddətdən sonra pulunu faizlə geri ala bilər. Qanunun əsas məqsədi Azərbaycanda startapların, gənc sahibkarların və kiçik bizneslərin bank krediti almadan da maliyyə cəlb edə bilməsi üçün hüquqi baza yaratmaqdır. Qanunda həm layihə sahibinin, həm investorun, həm də platformanın hüquq və vəzifələri dəqiq müəyyən edilir”.
“Bu Mexanizm Dövlət Zəmanəti Demək Deyil”
MCP başqanı bu mexanizmin iqtisadi əhəmiyyətini vurğulamaqla yanaşı, vətəndaşların vəsaitlərinin qorunması və risk amilləri barədə xəbərdarlıqlarını diqqətə çatdırıb:
“Bu qanun bir çox səbəbdən olduqca vacibdir. Bu mexanizm gənclərin və startapların maliyyəyə çıxışını asanlaşdırır, kiçik sahibkarlığın inkişafına təkan verir, yeni iş yerlərinin yaranmasına kömək edir və ölkədə investisiya mədəniyyətini inkişaf etdirir. İnsanların pulunun necə qorunacağına gəldikdə isə, qanun bunun üçün ciddi tələblər qoyur. Platformalar yalnız Mərkəzi Bankın nəzarəti və reyestrində fəaliyyət göstərə bilər. Layihələr və risklər barədə investorlara tam məlumat verilməlidir. İnvestorların vəsaitlərinin idarə olunması, geri qaytarılması və məlumatlandırılması qaydaları qanunla tənzimlənir.
Amma ən vacib məqamı da unutmaq olmaz: bu qanun asan qazanc və ya dövlət zəmanəti demək deyil. İnvestisiya edən şəxs risk daşıyır və layihə uğursuz olarsa, vəsaitini tam və ya qismən itirə bilər. Qanun platformaların bu risk barədə investorları əvvəlcədən açıq şəkildə xəbərdar etməsini tələb edir. Qısası, Kraudfandinq Azərbaycanda sahibkarlarla investorları bir platformada birləşdirən yeni maliyyələşdirmə mexanizmidir. Bu, xüsusilə gənclər, innovativ ideya müəllifləri və startaplar üçün alternativ mənbə yaradır, eyni zamanda investorların hüquqlarını qorumaq üçün dövlət nəzarəti və şəffaflıq tələblərini müəyyən edir”.
