“Müstəqilliyimiz Əbədidir” – Beynəlxalq Qalereyada fərdi yaradıcılıq sərgisi keçirilib
28 May – Müstəqillik Günü münasibətilə Beynəlxalq Qalereyada Yeni Azərbaycan Partiyası Yasamal Rayon Təşkilatı və Beynəlxalq Qalereyanın birgə təşkilatçılığı ilə istedadlı rəssam, müəllim Səadət Şahbazovanın tələbələri ilə birlikdə ilk fərdi yaradıcılıq sərgisi keçirilib. Sərginin layihə rəhbəri Aygün Əzizova olub.
Avropa.info xəbər verir ki, “Müstəqilliyimiz Əbədidir” adlı sərgidə Səadət Şahbazovanın və onun 10 tələbəsinin vətənpərvərlik mövzusunda 50-yə yaxın əsəri nümayiş etdirilib.
Sərgidə fəxri qonaq qismində XeberTime.az portalının rəhbəri Yeganə Telmanqızı, Qarabağ müharibəsi iştirakçısı, tibb işçisi Nəzakət Baxışova, ehtiyatda olan gizir Könül Əzimova, Azərbaycan Dövlət Rəssamlıq Akademiyasının müəllimi Zinaida Mirzəzadə və AESİM brendinin rəhbəri Aygün Kamilqızı iştirak ediblər.
Beynəlxalq Qalereyanın direktoru Elnurə İsgəndərova giriş sözü ilə çıxış edərək həm Müstəqillik Günü, həm də Qurban bayramı münasibətilə qonaqları təbrik edib. O, günün tarixi əhəmiyyətindən danışıb, sərgidə nümayiş olunan əsərlərin milli ruhda və yüksək sənət duyumu ilə ərsəyə gətirildiyini vurğulayıb. Bildirib ki, sərginin əsas məqsədi gənc nəslin Azərbaycançılıq ideologiyası, milli-mənəvi dəyərlər və vətənpərvərlik ruhunda formalaşmasına dəstək vermək, onların yaradıcılıq potensialını üzə çıxarmaq və incəsənətə marağını daha da artırmaqdan ibarət olub.
Fəxri qonaqlar çıxışlarında Beynəlxalq Qalereyanın fəaliyyətini yüksək qiymətləndiriblər. Qeyd ediblər ki, qalereya müxtəlif yaş qruplarından olan insanların asudə vaxtlarını səmərəli keçirməsinə, onların estetik zövqünün formalaşmasına, sənətə marağın artırılmasına və milli ruhda yetişməsinə mühüm töhfə verir. Çıxış edənlər belə layihələrin davamlı keçirilməsinin əhəmiyyətindən danışıblar, rəssam-müəllim Səadət Şahbazovaya və onun tələbələrinə gələcək fəaliyyətlərində yeni uğurlar arzulayıblar.
Sərgi zamanı hər bir rəssam nümayiş olunan əsərləri barədə ətraflı məlumat verib, əsərlərin ideyası, hazırlanma prosesi və mövzusu haqqında qonaqlarla fikirlərini bölüşüb. Tədbir çay süfrəsi arxasında səmimi söhbətlərlə davam edib, iştirakçılar sərgi ilə bağlı təəssüratlarını bölüşüblər.
Sonda sərgidə iştirak edən rəssamlara sertifikatlar təqdim olunub, xatirə fotoları çəkilib və tədbir xoş ovqatla başa çatıb.
Aygün Oqtay
Fotoların müəllifi: Ayaz
Operator: Camal
