“Şəhərsalma və Memarlıq İli” çərçivəsində 2 Fevral – Gənclər Gününə həsr olunmuş, layihə rəhbəri Aygün Əzizovanın olduğu “Gələcəyin gənci” adlı ilk fərdi yaradıcılıq sərgisi keçirilib.
Avropa.info xəbər verir ki, Azərbaycan Rəssamlar İttifaqının və Beynəlxalq Qalereyanın üzvü, Şuşa Dövlət Musiqili Dram Teatrının quruluşçu rəssamı, FA Art Tədris Mərkəzinin rəhbəri Fatma Əliyeva tələbələri ilə birgə Gənclər Gününə həsr olunmuş “Gələcəyin gənci” adlı ilk fərdi yaradıcılıq sərgisini təqdim edib.
Sərgi gənc rəssamların yaradıcılıq potensialını, onların sənətə baxışını və gələcəyə dair ümidlərini nümayiş etdirməyi hədəfləyir. Burada təqdim olunan əsərlər gənclərin daxili dünyasının, düşüncələrinin və arzularının rənglər vasitəsilə ifadəsidir.
Tədbirdə Yeni Azərbaycan Partiyası Yasamal Rayon Təşkilatının sədri Bəxtiyar Nəbiyev çıxış edərək gənclərin yaradıcılıq fəaliyyətinə verilən dəstəyin dövlət siyasətində mühüm yer tutduğunu vurğulayıb.
Beynəlxalq Qalereyanın direktoru Elnurə İsgəndərova sərginin gənc istedadların tanınması və beynəlxalq səviyyədə təqdim olunması baxımından əhəmiyyətini qeyd edib.
Sərgidə fəxri qonaq qismində Yeni Azərbaycan Partiyası Mərkəzi Aparat rəhbərinin müavini Ramilə Bədəlova, Milli Məclisin deputatı Göydəniz Qəhrəmanov iştirak ediblər.
FA Art Tədris Mərkəzinin rəhbəri Fatma Əliyeva isə tələbələrinin yaradıcılıq yolunda qazandıqları uğurları və bu sərginin onların inkişafında oynadığı rolu önə çəkib.
Qeyd: Sosial Maarifləndirmə İctimai Birliyinin Mədəniyyət Klubunun ansamblı tədbirin bədii hissəsini təqdim edib. Ansamblın bədii rəhbəri və Mədəniyyət Klubunun rəhbəri Əyyub Məmmədovdur.
Proqram çərçivəsində “American International Vocal Competition of Opera Singers 2023” Beynəlxalq Opera İfaçılarının Vokal Müsabiqəsinin qızıl medalçısı, Opera və Balet Teatrının solisti Urfan Cəfərov, Mədəniyyət Klubunun solistləri Yusif Sadıxov, Cahid Qubatov, Baxşəli Rəhimli, Kənan Bəşirli səhnəyə çıxaraq tamaşaçılara unudulmaz anlar yaşadıblar.
Bu zəngin musiqi proqramı sərgiyə xüsusi ovqat qataraq gənclərin yaradıcılıq enerjisini musiqi və vokal ifaları ilə tamamlayıb.
Sərginin sonunda rəssamlara və ifaçılara təqdim edilən diplomlar onların yaradıcılıq fəaliyyətinin rəsmi təsdiqi olmaqla yanaşı, gənc istedadların zəhmətinə göstərilən yüksək qiymətin, onların gələcək nailiyyətlərinə olan etimadın və mədəniyyət sahəsindəki fəaliyyətlərinin təşviq edilməsinin mühüm göstəricisi kimi dəyərləndirilib.
Tədbirin sonunda isə xatirə fotoları çəkilərək bu unudulmaz gün yaddaşlarda əbədi olaraq həkk olunub.
Aygün Oqtay
Fotolar Ayazındır
