SOCAR Midstream Gas Operations və Cənubi Qafqaz Boru Kəməri tərəfdaşlarının dəstəyi ilə həyata keçirilən “Yeni Üfüq” sosial layihəsi həssas qrupa aid 80 gəncin peşə bacarıqlarının artırılmasını və əmək bazarına çıxışını hədəfləyir.
23 yanvar 2026-cı ildə Bakıda valideyn himayəsindən məhrum gənclərin məşğulluq imkanlarının genişləndirilməsinə və bərabər inkişaf hüquqlarının təmin olunmasına yönəlmiş “Yeni Üfüq” layihəsinin rəsmi açılış mərasimi və Maraqlı Tərəflərin İştirakı Forumu keçirilib. Hilton Bakı otelində təşkil olunan tədbirdə dövlət qurumları, özəl sektor, qeyri-hökumət təşkilatları və layihə tərəfdaşları iştirak ediblər.
Layihə SOCAR Midstream Gas Operations (SOCAR MGO) və Cənubi Qafqaz Boru Kəməri (CQBK) tərəfdaşları tərəfindən maliyyələşdirilir, icrası isə HBN Group MMC-yə həvalə olunub.
Açılış mərasimində çıxış edən SOCAR Midstream Gas Operations şirkətinin İcraçı Direktoru Polad Rüstəmov bildirib ki, layihə SOCAR-ın sosial məsuliyyət yanaşmasının mühüm tərkib hissəsidir: “Hər bir gəncin sosial statusundan asılı olmayaraq bərabər inkişaf hüququ var. ‘Yeni Üfüq’ bu hüququ real imkanlara çevirən təşəbbüsdür və gənclərin peşə bacarıqlarının inkişafına, cəmiyyətə və əmək bazarına inteqrasiyasına xidmət edir.”
Azərbaycan Respublikasının Gənclər və İdman Nazirinin müavini İndira Hacıyeva isə çıxışında layihənin gənclərin sosial müdafiəsinin gücləndirilməsi, bərabər imkanların yaradılması və dövlət–özəl sektor əməkdaşlığının inkişafı baxımından əhəmiyyətini vurğulayıb.
Tədbirdə, həmçinin tərəfdaş qurumların və aidiyyəti dövlət orqanlarının nümayəndələri çıxış ediblər.
“Yeni Üfüq” layihəsi valideynlərindən birini və ya hər ikisini itirmiş, yaxud valideyn himayəsindən məhrum olmuş 15–18 yaş arası 80 gənci əhatə edir. Layihə çərçivəsində iştirakçılara ofis meneceri, satış və kassir, aşpaz və qrafik dizayner ixtisasları üzrə peşə təhsili, praktiki məşğulluq imkanları və psixososial dəstək təqdim olunacaq. Layihə 10 ay müddətində icra ediləcək.
Tədbirdə Dövlət Məşğulluq Agentliyi, Sosial Xidmətlər Agentliyi, KOBİA, Təhsildə Keyfiyyət Təminatı Agentliyi (TKTA), parlament komitələrinin nümayəndələri, uşaq evləri və internat məktəblərinin rəhbərləri, eləcə də müxtəlif sahələr üzrə özəl sektor şirkətləri təmsil olunub.
Təlim proqramları milli peşə standartlarına uyğun hazırlanıb. İştirakçılar yekun qiymətləndirmələrdən sonra TKTA tərəfindən rəsmi sertifikatlarla təmin ediləcək, Dövlət Məşğulluq Agentliyi ilə əməkdaşlıq çərçivəsində məşğulluq və təqaüd dəstəyi imkanları da nəzərdə tutulur.
Layihə gənclərin məşğulluğunun artırılmasına, həssas əhali qruplarının sosial müdafiəsinə və Dayanıqlı İnkişaf Məqsədi 8 – Layiqli Əmək və İqtisadi Artım üzrə milli prioritetlərin icrasına töhfə verir. Əsas hədəf iştirakçılar arasında ən azı 80 faiz məşğulluq səviyyəsinə nail olmaqdır.
