Respublika Gənclər Kitabxanasında Elm və Təhsil Nazirliyinin tabeliyində olan 4 nömrəli Uşaq-Gənclər İnkişaf Mərkəzi ilə birlikdə “Sözün taleyə çevrildiyi ömür – Bəxtiyar Vahabzadə” adlı tədbir keçirilib.
Avropa.info xəbər verir ki, Bəxtiyar Vahabzadənin zəngin ədəbi irsinin yeniyetmə və gənclər arasında təbliği məqsədilə təşkil edilən tədbirdə Firudin bəy Köçərli adına Respublika Uşaq Kitabxanasının direktoru, Əməkdar mədəniyyət işçisi Şəhla Qəmbərova, Xatirə Kitabı redaksiyasının baş redaktoru, şairə Nəzakət Məmmədova, professor, uşaq yazarı Solmaz Amanov, mərkəzin pedaqoji heyəti, dərnək üzvləri, məktəblilər, tələbə və gənclər iştirak edib.
Tədbir Ulu Öndər Heydər Əliyevin və dövlətin müstəqilliyi, ərazi bütövlüyü uğrunda canını fəda etmiş qəhrəman Azərbaycan oğullarının xatirəsinin bir dəqiqəlik sükutla yad edilməsi ilə başladı.
Tədbiri giriş sözü ilə açan kitabxananın direktoru Aslan Cəfərov Xalq şairi, akademik Bəxtiyar Vahabzadənin Azərbaycan ədəbiyyatında, milli düşüncə tarixində və ictimai şüurda tutduğu əvəzsiz roldan danışaraq, Azərbaycan Respublikasının Prezidenti cənab İlham Əliyevin Xalq şairi Bəxtiyar Vahabzadənin 100 illik yubileyinin qeyd olunması barədə 21 fevral 2025-ci il tarixində imzalandığı sərəncamına müvafiq olaraq Respublika Gənclər Kitabxanasında həyata keçirilən layihələrdən, hazırlanan materiallardan bəhs etdi.
Tədbir iştirakçıları öz çıxışlarında Bəxtiyar Vahabzadənin təkcə şair deyil, milli düşüncənin carçısı, ana dilimizin, milli kimliyimizin və azadlıq ideyalarının yorulmaz müdafiəçisi olduğunu, onun poeziyasında Azərbaycan insanının ruhunun, dərdinin, sevincinin, mübarizəsinin və gələcəyə olan inamının əks olunduğunu bildirdilər.
Tədbirdə Respublika Gənclər kitabxanasının əməkdaşları tərəfindən hazırlanan “Xalq şairi Bəxtiyar Vahabzadə – 100” adlı elektron bazanın təqdimatı ilə yanaşı İnkişaf Mərkəzinin nəzdində fəaliyyət göstərən Təsviri incəsənət dərnəklərinin üzvlərinin – gənc rəssamların çəkdikləri rəsmlərə baxış da keçirildi. Sərgidə 20-dən çox gənc, həvəskar rəssamın rəsm əsərləri sərgilənirdi.
Tədbirin bədii hissəsində 4 nömrəli Uşaq-Gənclər İnkişaf Mərkəzinin, “Dan Ulduzu” rəqs ansablının ifasında rəqs və şeirlərdən ibarət kompozisiyalar nümayiş olundu.
Tədbirin sonunda 4 nömrəli Uşaq-Gənclər İnkişaf Mərkəzinin metodisti Məshəti Məmmədova yaradılan şəraitə görə kitabxana əməkdaşlarına öz dərin minnətdarlığını bildirdi.
Aslan Cəfərov – Cəfər Cabbarlı adına Respublika Gənclər Kitabxanasının direktoru
Gunay Həsənova – Cəfər Cabbarlı adına Respublika Gənclər Kitabxanasının Elmi işlər üzrə direktor müavini (elektron bazanın təqdimatı)
Məshəti Məmmədova – 4 nömrəli Uşaq-Gənclər İnkişaf Mərkəzinin metodisti
Şəhla Qəmbərova Firudin bəy Köçərli adına Respublika Uşaq Kitabxanasının direktoru, Əməkdar mədəniyyət işçisi
Nəzakət Məmmədova – Xatirə Kitabı redaksiyasının baş redaktoru
Solmaz Amanova – professor, uşaq yazarı
