2020-ci ilin 27 sentyabrından başlayan və 44 gün davam edən İkinci Qarabağ müharibəsi ərzində xalqımız öz tarixinin ən şanlı günlərini yaşadı. Bu haqq savaşında Ali Baş Komandanın rəhbərliyi altında Azərbaycan ordusu və Azərbaycan xalqı tarix yazdı. Vətən müharibəsində əldə etdiyimiz qələbənin nəticəsidir ki, bu gün Azərbaycan xalqı dünya arenasında qalib xalq hesab edilir.
Qarabağın düşmən işğalından azad edilməsi ilə xalqımızın otuz illik həsrətinə son qoyuldu. Müzəffər Ali Baş Komandanımız, rəşadətli ordumuz doğma torpaqlarımızı öz əzəli və əbədi sahiblərinə qaytardı. Məhz Vətən müharibəsində əldə etdiyimiz qələbə sayəsində biz bu gün qalib ölkənin, bütöv Azərbaycanın vətəndaşlarıyıq.
İkinci Qarabağ müharibəsinin Vətən müharibəsi adlandırılması heç də təsadüfi deyil. Çünki bu müharibədə Azərbaycan xalqı öz Vətəninin bütövlüyü uğrunda, vahid amal ətrafında birləşərək əsl həmrəylik, birlik nümayiş etdirdi və nəticədə qələbə çaldı.
Azərbaycanın Vətən müharibəsində qalib gəlməsi ilə Qarabağ yenidən dirçəlməyə başladı. Artıq əbədi olaraq bu torpaqlarda Azərbaycan xalqı yaşayacaq. Burada doğma Azərbaycan dilində danışılacaq. Mədəniyyət beşiyimiz Qarabağda Azərbaycan muğamı səslənəcəkdir.
Cənab prezidentin də qeyd etdiyi kimi, “Biz bundan sonra qalib ölkə, müzəffər xalq kimi əbədi yaşayacağıq”.
Nəinki Azərbaycanın, hətta Qafqazın incisi hesab edilən Şuşada 2021-ci ildən etibarən keçirilməyə başlanan “Xarı bülbül” festivalı Azərbaycan üçün böyük mənəvi və tarixi dəyər kəsb edir. Bu festival Qarabağa əsl sahiblərinin qayıtmasının müjdəçisidir.
2021-ci ilin 12-13 may tarixlərində baş tutmuş “Xarıbülbül” festivalının ən yaddaqalan məqamı sonda Ümummilli Lider Heydər Əliyevin Şuşa haqqında söylədiyi tarixi sözlərin video-çarx şəklində təqdim edilməsi oldu. Heydər Əliyev deyirdi:
“Arzu edirəm ki, sizinlə birlikdə gedək Şuşaya. Gedəcəyik! İnanın ki, gedəcəyik! Şuşa Azərbaycanın gözüdür. Hər bir azərbaycanlı üçün iftixar nöqtəsidir. Şuşa bizim mədəniyyətimizin, tariximizin rəmzidir. Şuşa hamı üçün əzizdir…”
Ulu Öndərin bu sözləri necə böyük inamla, əminliklə, necə böyük sevgi ilə dediyini duymamaq mümkün deyil.
Fenomen şəxsiyyət, görkəmli siyasi xadim olan Heydər Əliyev, İlham Əliyev haqqında “mən ona özüm qədər inanıram, mənim başa çatdıra bilmədiyim bütün işləri İlham Əliyev başa çatdıracaq” deyərkən Qarabağın düşmən işğalından azad edilməsini, bugünkü qüdrətli Azərbaycanı nəzərdə tuturmuş.
Azərbaycanın bu möhtəşəm qələbəni qazanmasının ən əsas və əhəmiyyətli amili Azərbaycan xalqının öz lideri ətrafında dəmir yumruq kimi birləşməsi oldu.
Cənab Prezident İlham Əliyev hər zaman çıxışlarında qeyd edir ki, o, xalqın dəstəyinə arxalanır. Bunu İlham Əliyevin təkcə çıxışlarında deyil, eyni zamanda, atdığı bütün addımlarında da görmək olar. Məsələn, cənab prezident hətta öz ad günlərini Azərbaycan xalqı ilə qeyd edir. O, uzun illər idi ki, ad günlərini məcburi köçkünlərlə birgə qeyd etməyi ənənə halına çevirmişdi. Prezident bu görüşlərində həmişə deyir ki, işğal vəziyyəti müvəqqətidir, biz torpaqlarımızı işğaldan azad edəcəyik.
Böyük siyasətçi bu vədinə böyük uğurla nail oldu. Artıq möhtəşəm qələbəmizdən sonra İlham Əliyev öz doğum gününü işğaldan azad edilmiş Qarabağ torpaqlarında qalib lider kimi qeyd edir.
Eyni zamanda, bununla cənab Prezident bir daha sübut edir ki, onun üçün ən xoş günlərin simvolu Şuşadır, işğaldan azad olunmuş Qarabağdır.
Ülviyyə Ağayeva
Milli Məclisin deputatı
