Oktyabrın 28-də “Ziyalı Ocağı” İctimai Birliyi Fəxrəddin Piriyev adına Sumqayıt şəhər 18 nömrəli tam orta məktəbdə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Uşaq və gənclərin zərərli xarici təsirlərdən müdafiəsi” layihəsi çərçivəsində “Vətən gəncliklə öyünür” adlı seminarını gerçəkləşdirib.
Avropa.info xəbər verir ki, seminar torpaqlarımızın azadlığı uğrunda canından keçən Vətənin qəhrəman oğullarının -Şəhidlərin xatirəsinə ehtiram əlaməti olaraq bir dəqiqəlik sükutla başlayıb.
Seminarı giriş sözü ilə Fəxrəddin Piriyev adına 18 nömrəli tam orta ümumtəhsil məktəbin direktor vəzifəsini müvəqqəti icra edən Nərminə Ömərova açıb. Nərminə Ömərova bildirib ki,təyinatı mövzu üzrə məktəbin şagirdlərinin mütəmadi şəkildə maarifləndirilməsinə ehtiyac var. “Uşaqların və yeniyetmələrin zərərli xarici təsirlərdən müdafiəsi günümüzün aktual məsələlərindəndir”, – deyə o əlavə edib.
Layihə rəhbəri İlahə Əliyeva müasir dövrümüzdə internetin, sosial şəbəkələrin həyatımızdakı yerindən, onların xeyirli və ziyanlı tərəflərindən bəhs edib.
İ.Əliyeva bildirib ki, müxtəlif internet resurslarından öz çirkin məqsədləri üçün istifadə edən zərərli və zəhərli qüvvələrin məqsədləri ölkəmizdə dinc quruculuq işlərinə zərbə vurmaq, birliyimizi, bərabərliyimizi pozmaqdır: “Təbii ki, bu mənfur qüvvələrə qarşı təkcə dövlət deyil, bütün ölkə vətəndaşları mübarizə aparmalıdır. Uşaqların və yeniyetmələrin bu zəhərli və zərərli qüvvələrin təsirləri altına düşməsinə, onların mənfur məqsədlərinin reallaşmasına imkan verilməməlidir”.
Layihə rəhbəri vurğulayıb ki, xaricdən idarə olunan bir sıra qüvvələr din, demokratiya adı altında virtual aləm vasitəsi ilə bizim coğrafi məkana soxulur, müxtəlif bəzəkli, içi boş, yalançı vədlərlə, şər-böhtanlarla uşaqların, yeniyetmələrin beyinlərini zəhərləməyə çalışırlar.
“Bu qüvvələrə qarşı təkcə dövlət, aidiyyəti qurumlar deyil, həmçinin, vətəndaş cəmiyyətləri institutları, ümumiyyətlə, vətənini, millətini sevən hər kəs bu məsələyə münasibətdə sayıqlıq və həmrəylik nümayiş etdirməlidir. Biz bu gün məhz bu müqəddəs mənəvi borc naminə sizinlə birgəyik. Sağlam, güclü gələcək naminə məqsədimiz, amalımız bu yolda durmadan-dayanmadan çalışmaqdır. Uşaqlarımızın, yeniyetmələrimizin milli ruhda böyüməsi və tərbiyə olunması ən bizim ümdə vəzifəmizdir. Siz bizim sabaha boylanan ümidlərimizsiniz, güclü, müstəqil Azərbaycanımızın bir parçasısınız. Sizin hər biriniz sabah vətən torpaqlarını qoruyacaq, müxtəlif sahələrdə oxuyacaq, çalışacaq, vətən yükünü çiyinlərinizdə daşıyacaqsınız. Bu müqəddəs yük sizi həmişə qürurlandıracaq və siz fəxrlə bu müqəddəs yükü gələcək nəsillərə ötürməlisiniz. Amalımız güclü, parlaq və müstəqil Azərbaycan olmalıdır. Müstəqilliyimizə dil uzadlanların dili, əl uzadanların əli kəsilməlidir”, – deyə o qeyd edib.
“Uşaqlar və yeniyetmələr arasında vətənpərvərliyin təbliği” mövzusunda məruzə edən layihənin eksperti Fuad Hüseynzadə müasir dünyada, beynəlxalq aləmdə sosial şəbəkələrin funksiyasından, fəaliyyətindən geniş şəkildə söz açıb.
Ekspert söyləyib ki, bu gün hər kəs internetə və müxtəlif sosial platformalara daxil olur:
“Burada həllini tapmağa çalışdığınız sualların və məsələlərin cavabı bir çox hallarda sizi razı salır, birbaşa desək, bir növ işinizi asanlaşdırır. Zamana və əməyə qənaət edirsiniz. Bu məsələnin müsbət tərəfidir. Amma siz uşaqların, yenitetmələrin bəzən maraqları daha çox məlumat əldə etməyə, biliklər qazanmağa doğru fokuslanır. Bəzən axtara-axtara getdiyiniz bu maraq sizi adını doğru və düzgün bildirməyən ünvanlara doğru götürə bilər. Siz çox ehtiyatlı davranmalısınız. Bu qeyri-qanuni, naməlum ünvanlarda yuva salan qərəzli şər qüvvələrin məqsədi sizi yanlış və təhlükəli səmtə götürməkdir. Maskalanmış bu qüvvələrin məqsədi sizə yaxşılıq etmək deyil, onlar sizə, bizə, bütünlükdə ölkəmizə qarşı qarayaxma kompaniyası aparmaqla birliyimizə, bərabərliyimizə xələl gətirməkdir, müstəqilliyimizə təhlükə yaratmaqdır. Siz sosial şəbəkələrdə ehtiyatlı olmalısınız və bu mənfur qüvvələrin təsiri altına düşməməli, hətta onlara qarşı mübarizə aparmalısınız”.
Fuad Hüseynzadə çıxışında şagirdlərə vətənpərvərlik duyğuları aşıladı, şagirdləri canlı debata dəvət edib. Şagirdlərin maraq dairəsi, sosial şəbəkələrdəki aktivlikləri müqayisəli şəkildə analiz edilib.
Seminarda iştirak edən araşdrımaçı jurnalist Rəsul Mirhəşimli şagirdləri əsassız və naməlum mənbələrdən məlumat alınmaqdan çəkinməyə çağırıb. O, internetdə, habelə, müxtəlif sosial platformalarda yayılan dezinformasiyalara inanmamağa, rəsmi, dövlət orqanları vasitəsilə yayılan məlumatlara inanmağa, onları oxumağa dəvət edib. Çıxışçı xaricdən gözlənilən hər cür zərərli ideoloji təxribatlardan uzaq durmağa, qərəzli və qəsdli, məqsədli qüvvələrə qarşı çıxmağa, onları ifşa etməyə çağırıb.
Rəsul Mirhəşimli bildirib ki, bu gün yeniyetmələrin üzləşdiyi ən böyük problemlərdən biri internet asılılığıdır:
“Sosial şəbəkələr, oyunlar və videolar o qədər cəlbedici olur ki, yeniyetmələr saatlarla ekran qarşısında qalır. Nəticədə dərslərə diqqət azalır, yuxu rejimi pozulur, fiziki aktivlik azalır, real ünsiyyət bacarıqları zəifləyir.
Psixoloqlar qeyd edirlər ki, gündə 4 saatdan artıq sosial şəbəkələrdə vaxt keçirmək artıq riskli sayılır.
İnternetdə anonimlik bəzən aqressiv davranışlara yol açır. Bu zaman yeniyetmələr təhqir və alçaldılma ilə qarşılaşa, foto və videolarının icazəsiz paylaşılması ilə üzləşə bilər”.
Tədbir iştirakçı şagirdlər arasında sorğu ilə davam etdirilib. Onların maraq dairəsi, internetdə -müxtəlif sosial platformalarda fəaliyyətləri müzakirə olunub.
