27 oktyabr 2025-ci il tarixində F. Köçərli adına Respublika Uşaq Kitabxanasında Zəfər Günləri ərəfəsində uşaq yazarı Çinarə Köçərli ilə görüş keçirilib. Görüşdə paytaxtın 232 nömrəli məktəbin şagirdləri, müəllimlər və kitabxana əməkdaşları iştirak ediblər.
Avropa.info xəbər verir ki, Tədbir Azərbaycan Respublikasının Dövlət Himninin səsləndirilməsi və Vətən uğrunda şəhid olmuş qəhrəmanların xatirəsinin bir dəqiqəlik sükutla yad edilməsi ilə başlayıb. Ardınca yazıçının üçcildlik “44 gün Qarabağda” kitabının 3-cü hissəsi “Böyük Qayıdış” kitabı haqqında ətraflı məlumat verilib, kitabla bağlı videoçarx nümayiş etdirilib.
Təqdimatda Çinarə Köçərli oxuculara Vətən sevgisi, igidlik və azadlıq uğrunda mübarizə kimi dəyərləri aşılamağın vacibliyindən danışıb. Yazıçı kitablarından seçilmiş hekayə və şeirləri səsləndirib, əsərlərdə təsvir olunan tarixi məkan və abidələrin fotoları üzərində dayanaraq onların mənəvi dəyərindən söz açıb.
“Böyük Qayıdış” anlayışının məğzini daha dərindən anlamaq üçün yazıçı uşaqlarla interaktiv müzakirə aparıb, onların fikirlərini dinləyib. Şagirdlər Zəfər Gününə həsr olunmuş şeirlər səsləndirib, Qarabağ mövzusunda öz düşüncələrini bölüşüblər. Görüş maraqlı sual-cavab şəklində davam edib və gənc oxucuların böyük marağına səbəb olub.
Tədbirin sonunda iştirakçılar Çinarə Köçərlinin yeni nəşr olunmuş “Oyun və Mən” kitabı ilə də tanış olublar. Müəllif bildirib ki, bu kitab uşaqlara birgə oyunlar və komikslər vasitəsilə dostluq, əməkdaşlıq və sağlam ünsiyyət bacarıqlarını aşılamaq məqsədi daşıyır.
Sonda yazıçı oxucularına öz kitablarını hədiyyə edib, onları sevgi ilə imzalayaraq xatirə şəkli çəkdirib.
Görüş gənc nəsildə vətənpərvərlik ruhunun daha da güclənməsinə, müasir Azərbaycan ədəbiyyatına marağın artmasına və kitab oxuma vərdişlərinin təşviqinə mühüm töhfə verir.
