“Milli Düşüncə və İnkişaf” İctimai Birliyi “Sosial media ilə iş sahəsində təlimlərin təşkili” mövzusunda yeni layihəyə start verib. Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilir.
Layihə barədə məlumat verən “Milli Düşüncə və İnkişaf” İctimai Birliyinin sədri Əlövsət Talışxanlının sözlərinə görə, müasir dünyada suveren dövlətlərin təhlükəsizliyinə yönəlmiş artan siyasi-ideoloji təhdidlər dövlətlə cəmiyyət arasında sıx əməkdaşlığı zəruri edir. Bu cür təhdidlərə qarşı Qeyri-Hökumət Təşkilatlarının da müvafiq bilik və bacarıqlara yiyələnməsi vacibdir.
Ə.Talışxanlı qeyd edib ki, psixoloji informasiya savaşlarının getdiyi bir dövrdə sosial şəbəkələrlə effektiv işləmək bacarıqları QHT-lər üçün mühüm əhəmiyyət kəsb edir. Bu məqsədlə layihə çərçivəsində Bakı şəhərində fəaliyyət göstərən 15 QHT nümayəndəsi üçün sosial media sahəsində praktiki təlimlər keçiriləcək.
Eyni zamanda, layihə çərçivəsində müasir informasiya təhdidlərinə dair maarifləndirici buklet hazırlanacaq və ictimaiyyətin diqqətinə təqdim olunacaq.
