Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Miqrant Uşaqlara Dəstək” İctimai Birliyinin növbəti tədbiri bu dəfə gəzinti deyil, öyrənmə və yaradıcılıq üzərində qurulub.
Avropa.info xəbər verir ki, 2025-ci il iyunun 24-də İctimai Birliyin ofisində təşkil olunan məşğələdə həm miqrant uşaqlar, həm də onların valideynləri iştirak ediblər. Tədbirə qatılan uşaqlar əsasən Əfqanıstandan gəlmiş ailələrin övladları olub, onlar təlimə böyük maraq göstəriblər.
Təlimçi Gülyaz Əsgərova əvvəlcə uşaqlara dəftər və qələm, məktəbə getməyən balacalara isə pazllar paylayıb. Daha sonra Azərbaycan dilinin zənginliyi barədə söhbət açıb, söz yaradıcılığından və cümlə quruluşundan danışıb. O, cümlədə sözlərin yerləşmə ardıcıllığını izah edərək, hər bir uşağın prosesdə aktiv iştirak etməsinə şərait yaradıb.
Təlimçi Azərbaycanın zənginliyini ifadə edən qısa inşalar yazmağı təklif edib. Uşaqlar bu tapşırığı həvəslə yerinə yetiriblər. Xüsusilə Aksanın yazdığı inşa məzmun və ifadə baxımından daha fərqli olub.
Sonrakı mərhələdə çoxhecalı sözlərdən yeni sözlərin yaranması üzrə tapşırıqlar verilib. Azərbaycan və Qarabağ kimi sözlərdən yeni sözlər düzəltmək üçün uşaqlar böyük səy göstəriblər. Bu mərhələdə Sədəf ən çox söz tapan uşaq olub və fəallığına görə fərqlənib.
Məşğələnin sonunda uşaqların pazllardan hazırladığı fiqurlara baxılıb. Fiqurları tamamlamaqda çətinlik çəkən uşaqlara kömək göstərilib və nəticədə maraqlı kompozisiyalar ortaya çıxıb.
Tədbir həm maarifləndirici, həm də əyləncəli şəkildə keçib, uşaqlar dil və yaradıcılıq bacarıqlarını inkişaf etdirmək imkanı qazanıblar.
