Avropa.info xəbər verir ki, İsrail  mediası, HƏMAS-ın Qəzzada atəşkəs və əsir mübadiləsi razılaşmasına verdiyi reaksiyanın təfərrüatlarını bildirib və bu dəyişikliklər vasitəçilərə çatdırılıb.

Kanal 13 Televiziyasının məlumatına görə, İsrail  Filadelfi dəhlizindən və Qəzza sərhədi boyunca yerləşən bufer zonalardan geri çəkilməkdən imtina edərək, bunun ” Qəzza sərhədi  boyunca İsrail yaşayış məntəqələrinin təhlükəsizliyini təmin etmək üçün dövlətin imkanlarını sarsıdacağını” iddia edib .

Təl-Əviv rəhbərliyi də HƏMAS-ın fələstinli məhbusların azad edilməsi tələblərini rədd edərək, “çox sayda fələstinlinin azad edilməsinin Qəzzada israilli məhbuslarla bağlı razılaşmaya imkan verməyəcəyini” iddia edib.

İsrail həm də HƏMAS-ın “Rəfah sərhəd-keçid məntəqəsinin açılması və humanitar yardımın paylanması mexanizminin dəyişdirilməsi tələbini” qəti şəkildə rədd edib.

“İsrail Hayom” qəzetinin məlumatına görə, Həmas  Qəzzaya Humanitar Yardım Fonduna bağlı yardım paylama mərkəzlərinin bağlanması və Birləşmiş Millətlər Təşkilatı  vasitəsilə köhnə paylama mexanizminin davam etdirilməsi tələbini qəbul etməyib .

İsrail həmçinin ölən məhbuslar müqabilində fələstinli əsir və girovların azad edilməsi, Qəzzanın bufer zonasının azaldılması,  Xan Yunus və Rəfahın  böyük hissəsindən ordunun çıxarılması tələblərini də rədd edib.

Kanal 13 Televiziyasının məlumatına görə, İsrail vasitəçilərə təqdim etdiyi layihədə hərbi qüvvələrinin əhəmiyyətli bir hissəsini 60 gün ərzində (atəşkəs müddəti) geri çəkməyə hazır olduğunu, lakin müharibəni bitirməyə hazır olmadığını çatdırıb.

Təfərrüatları İsrail mətbuatında dərc olunan bu “atəşkəs razılaşması layihəsinə” hələ də HƏMAS-dan heç bir cavab verilməyib.

Danışıqlar prosesində çıxılmaz vəziyyət

HƏMAS iyulun 24-də İsraillə məhbus mübadiləsi və Qəzzada atəşkəs üçün təqdim olunan vasitəçilər layihəsinə cavabını təqdim etdiyini açıqlayıb.

İsrail Baş Nazirlik Ofisi yazılı açıqlama verərək HƏMAS-ın cavabının vasitəçilər vasitəsilə Təl-Əvivə çatdığını və qiymətləndirildiyini açıqlayıb.

ABŞ  prezidenti Donald Trampın Yaxın Şərq üzrə xüsusi nümayəndəsi Stiv Vitkoff “Həmas”ın atəşkəslə razılaşmaq istəmədiyini iddia edərək, Qətərin paytaxtı Dohada atəşkəs danışıqlarını aparan komandanı “məsləhətləşmə məqsədilə” geri çağırmaq qərarına gəldiklərini qeyd edib.

Misir  və  Qətər  iyulun 25-də Qəzza zolağında məsləhətləşmələr üçün danışıqların dayandırılmasının normal bir vəziyyət olduğunu açıqlayıb.