AA müxbirinin yerli mənbələrdən əldə etdiyi məlumata görə, həftənin əvvəlindən bəri Siciliyanın qərbində Trapani və Palermo şəhərləri arasında müxtəlif yerlərdə çoxsaylı meşə yanğınları başlayıb.
Qrisi qəsəbəsinə yaxın meşəlik ərazidə dünən başlayan yanğın Partiniko qəsəbəsinə qədər geniş ərazini əhatə edib.
Yanğına iki yanğınsöndürmə təyyarəsi və iki helikopter havadan müdaxilə edib, yanğınsöndürənlər və mülki müdafiə qrupları isə yerdən söndürmə işlərinə dəstək verib.
Küləyin təsiri ilə yanğının ev və daxma kimi bəzi tikililərə, bəzi nöqtələrdə isə magistral yollara keçdiyi müşahidə edilib.
İtaliyanın ANSA xəbər agentliyi bildirib ki, bu gün rekord hava istiliyinin 40 dərəcə Selsidən çox olduğu Siciliya adasındakı Palermo şəhəri ətrafında son günlər irili-xırdalı 50-dən çox yanğın baş verib.
Bildirilib ki, təkcə Partinikoda 7 yanğın baş verib, 2 ev kül olub və xeyli ərazinin külə dönməsinə səbəb olub.
Ehtiyat tədbiri olaraq ərazidəki 30-a yaxın evin boşaldıldığı bildirilib.
Yanğınsöndürmə işləri zamanı bir yanğınsöndürən tüstüdən təsirlənərək xəstəxanaya aparılıb.
Bu arada mətbuatda Siciliya adasının şərq hissəsində, Mineo və Kataniya şəhərlərinin ətrafında bəzi meşə yanğınlarının başladığı və onların söndürülməsi üçün işlərin aparıldığı xəbəri yayılıb.
Ölkənin digər ən böyük adalarından biri olan Sardiniyanın cənubundakı Serramanna qəsəbəsi yaxınlığında baş verən meşə yanğınının axşam saatlarında yanğınsöndürmə qruplarının müdaxiləsi ilə nəzarət altına alındığı bildirilib.
