İyul ayının 20-də Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti, Alban-Udi Xristian dini icması və Beynəlxalq Qalereyanın birgə dəstəyi ilə “Qəbələ mənzərələri” adlı etüd-sərgi təşkil olunub. Ulu Öndər Heydər Əliyevin anadan olmasının 102-ci ildönümünə həsr edilən tədbir Aygün Əzizovanın rəhbəri olduğu “Vətənpərvərlik Etüdləri” layihəsi çərçivəsində keçirilib.
Avropa.info xəbər verir ki, etüddə “RF ART Studio”nun rəhbəri Fidan Rüstəmzadə tələbələri ilə birlikdə iştirak edib. Etüd Qəbələ Dövlət Tarix-Bədii Qoruğunda, Yeddi Gözəl Şəlaləsi ətrafında, Alban-Udi icmasında, X əsrə aid qala divarları ətrafında təşkil olunub. Rəssamlar bir-birindən möhtəşəm əsərlər ərsəyə gətiriblər. Etüdlər açıq havada sərgilənib və rəssamlar diplomlarla təltif olunublar. 25 nəfər rəssamın hər birinə xüsusi hədiyyələr və etüddə iştirak diplomu təqdim olunub.
Etüd iştirakçılarını Qəbələ Dövlət Tarix-Bədii Qoruğunun direktoru Zahir Kərimov və qoruğun digər əməkdaşları Xəyyam Yusifov, Səfa Şirinov qarşılayıblar və qoruq haqqında geniş məlumat veriblər.
İştirakçılar, həmçinin Qəbələ Arxeoloji Mərkəzinə də ekskursiya ediblər. Buradakı qala ərazisi və qala divarları X əsrə aiddir. Bura qədim şəhərin giriş qapısı olub.
Sərgidə fəxri qonaq qismində Ağdam rayon Heydər Əliyev Mərkəzinin direktoru Namiq Həsənov, UNEC-in dosenti Nailə Yusifova, həkim-rəssam Səadət Cəfərova, vokalist-rəssam Aynur Yunusova və rəssam-müəllim Aygün Qürbətova iştirak ediblər.
Etüd iştirakçılarının Udi icması ilə görüşü də baş tutub. Qonaqlar Udi Mədəniyyət Günündə Müqəddəs Yelisey adına kilsədə keçirilən “Vəftiz mərasimi” bayram tədbirində iştirak ediblər. Alban-Udi Xristian dini icmasının sədri Robert Mobili, sədr müavini Rafik Danakari və digər icma nümayəndələri etüd iştirakçılarını yüksək qonaqpərvərliklə qarşılayıblar. Robert Mobili Udi icmasının fəaliyyəti və onlara göstərilən dövlət qayğısı barədə məlumat verib.
Beynəlxalq Qalereyanın direktoru Elnurə İsgəndərova bu görüşlərin Azərbaycan multikulturalizminə və tolerantlığına töhfə verdiyini bildirib. O, bu cür görüşlərin gənclərin dünya görüşünün formalaşmasında və vətənpərvər ruhda böyüməsində mühüm rol oynadığını vurğulayıb. Etüd iştirakçılarına uğurlar arzulayıb.
Qonaqlar ziyarət zamanı Müqəddəs Yelisey (Cotari) adına Alban kilsəsi və Müqəddəs Məryam (Bulun) adına Alban kilsəsi haqqında ətraflı məlumat alıblar.
Qeyd edək ki, Beynəlxalq Qalereya tərəfindən İsmayıllıda səhər yeməyi, Şamaxıda isə çay süfrəsi təşkil olunub. Robert Mobili tərəfindən isə udi xalqına məxsus zəngin nahar süfrəsi təqdim edilib.
Aygün Oqtay,
Fotolar Camalındır
