Azərbaycan Ordusunun qələbəsi ilə yekunlaşan Tovuz döyüşlərindən beş il ötür.
Avropa.info xəbər verir ki, Cəfər Cabbarlı adına Respublika Gənclər Kitabxanasının əməkdaşları tərəfindən Tovuz döyüşləri ilə əlaqədar “Tovuz döyüşləri – Zəfərə gedən yolun başlanğıcı” adlı virtual kitab sərgisi və “Zəfər salnaməsinin şanlı səhifəsi – Tovuz döyüşləri” adlı məlumat bülleteni hazırlanıb.
İstifadəçilər bu materiallardan yararlanaraq Tovuz döyüşləri haqqında qısa zaman kəsiyində çox ətraflı və dolğun məlumat almaq imkanına malikdirlər. Virtual kitab sərgisində bir sıra rəsmi sənədlərin, bu döyüşlərdə şəhid olmuş igid Azərbaycan oğullarının hərbi xidməti, keçdikləri döyüş yolu haqqında qələmə alınmış kitab və dövrü mətbuat nümunələrinin tam mətni təqdim edilir. “Tovuz döyüşləri – Zəfərə gedən yolun başlanğıcı” adlı virtual sərgidə “Tovuz döyüşləri-iyul şəhidləri”, “Vətən uğrunda”, “Polad ömrü”, “Əfsanəvi general”, “Akula ləqəbli kəşfiyyatçı”, “Möhtəşəm zəfərin nişanəsi” kimi 10-dan çox kitabın və “Azərbaycan”, “Yeni Azərbaycan”, “Xalq”, “525-ci qəzet”, “İki sahil”, “Səs” kimi mətbu nəşrlərdə yer alan “Tovuz döyüşləri – Zəfərin başlanğıc məqamı”, “Tovuz döyüşləri: Qəhrəmanlıq salnaməmiz…”, “Tovuz döyüşləri qələbəmizin təməli oldu” kimi məqalələr sərgilənir.
Virtual kitab sərgisi kitabxananın rəsmi saytında https://www.ryl.az/multimedia/tovuz-doyusleri-zefere-geden-yolun-baslangici yerləşdirilib.
“Zəfər salnaməsinin şanlı səhifəsi – Tovuz döyüşləri” adlı məlumat bülletenində Şanlı Qələbəyə gedən yolun başlanğıcında duran, adını Azərbaycanın Zəfər Salnaməsinə qızıl hərflərlə yazan Tovuz döyüşlərinin iştirakçıları haqqında toplanmış ətraflı məlumat, onların həyat və döyüş yolundan bəhs edən kitab və məqalələrin siyahısı təqdim edilir.
“Zəfər salnaməsinin şanlı səhifəsi – Tovuz döyüşləri” adlı məlumat bülleteni kitabxananın rəsmi saytında https://www.ryl.az/funds/melumat-b%C3%BClleteni yerləşdirilib.
