Azərbaycan prinsipial olaraq bütün qonşu dövlətlərlə sülh, sabitlik və dostluq şəraitində münasibətləri inkişaf etdirməyin tərəfdarı kimi çıxış edir. Hətta uzun illər münaqişə vəziyyətində olduğumuz Ermənistanla belə hazırda sülh prosesinə qədəm qoyulub və yüksək səviyyədə diplomatik danışıqlar davam etdirilir.
Avropa.info xəbər verir ki, bunu Sosdem.az-a Milli Cəbhə Partiyasının başqan müavini, politoloq Tural İrfan deyib.
“Əliyev və Pezeşkianın Görüşləri İkiölkəli Əlaqələrə Yeni Təkan Verir”
Ekspert Azərbaycan və İran arasında son dövrlər müşahidə olunan diplomatik yaxınlaşmanı yüksək dəyərləndirib:
“İranla da bir çox strateji sahələrdə yaxın əlaqələrimiz mövcuddur. Qarşılıqlı anlaşma şəraitində münasibətlərin inkişafı hər iki ölkə üçün daha uğurlu nəticələr ortaya qoyur. Azərbaycan Respublikasının Prezidenti İlham Əliyevin İran Prezidenti Məsud Pezeşkianla səmimi münasibətləri, keçirilən görüşlər və verilən birgə mesajlar bu yaxınlaşmanın əyani təsdiqidir. İki ölkə arasında diplomatik münasibətlərin tam bərpası və intensivləşməsi xüsusilə nəqliyyat-kommunikasiya sahəsində qarşılıqlı faydalı əməkdaşlıq imkanları yaradır. Məsud Pezeşkianın münasibətləri daha şəffaf və sıx qurmaq yönündəki səyləri təqdirəlayiqdir”.
“Azərbaycan Hər Zaman Dostluq Əlini Uzadıb”
MCP rəsmisi Bakının kənar təxribatlara baxmayaraq, hər zaman xoşniyyətli siyasət yürütdüyünü diqqətə çatdırıb:
“Şübhəsiz ki, Azərbaycan şəffaf və səmimi dostluq münasibətlərində əvvəldən maraqlı olub və bunu əməli addımları ilə sübut edib. Müxtəlif dövrlərdə İranda baş vermiş hadisələr və böhranlar zamanı Azərbaycan hər zaman maddi və mənəvi kömək əlini uzadıb.
Təbii ki, İrandakı müəyyən dairələrin bu münasibətlərə maneələr yaratmaq cəhdləri də az olmayıb. Pozuculuq fəaliyyətləri və təxribatlar zaman-zaman əlaqələrə xələl gətirib. Lakin hazırkı mərhələdə münasibətlərin müsbət yöndə inkişafı vaxtilə baş vermiş mənfi halların bir daha təkrarlanmayacağına ümid yaradır. Ölkələr arasında dialoqun yenidən sağlam zəmində qurulması yakın perspektivdə bütün region üçün müsbət dividentlər gətirəcək”.
