İsrail ordusu İranın paytaxtı Tehranın mərkəzinə genişmiqyaslı hava hücumları təşkil etdiyini və bu hücumlarda onlarla hədəfin vurulduğunu iddia edib.
Avropa.info xəbər verir ki, İsrail ordusunun bəyanatına görə, hədəflər arasında raket istehsalında istifadə edilən hərbi istehsal müəssisələri və İranın nüvə silahı proqramı ilə bağlı tədqiqat və inkişaf müəssisələri yer alıb.
Gecə saatlarında həyata keçirilən hücumlarda İsrail Hərbi Hava Qüvvələrinə məxsus 60-dan çox döyüş təyyarəsi 120 müxtəlif sursatla İrandakı onlarla hərbi obyekti vurub.
Bildirilib ki, hücumlar İran Müdafiə Nazirliyinin nəzdində illər ərzində yaradıldığı iddia edilən Tehranda raket istehsalı mərkəzlərini hədəf alıb. Bu mərkəzlərdə raket mühərrikləri üçün xammal istehsal olunduğu iddia edilirdi.
Bunun İranın nüvə silahı layihəsini hədəf alan hücumların tərkib hissəsi olduğu da bildirilib.
Bu kontekstdə 2011-ci ildə İranın nüvə silahı proqramının qurucularından biri olan Muhsin Fəxrizadə tərəfindən yaradılan və qabaqcıl hərbi texnologiyaların araşdırılaraq inkişaf etdirildiyi SEPAND komanda mərkəzinin də hədəfə alındığı iddia edilib.
İsrail ordusu həmçinin İranın nüvə silahı layihəsinin komponentlərindən birinin istehsal olunduğu obyektə hava zərbəsi endirdiyini iddia edib.
Hücumlarla bağlı İran rəsmiləri tərəfindən hələlik heç bir rəsmi açıqlama verilməyib.
